ۇكىمەت 2026 جىلعى بيۋدجەتتىڭ نەگىزگى پارامەترلەرىن ۇسىندى، دەپ حابارلايدى Dalanews.kz.
ءماجىلىستىڭ جالپى وتىرىسىندا "2026 – 2028 جىلدارعا ارنالعان رەسپۋبليكالىق بيۋدجەت تۋرالى" زاڭ جوباسىن قاراۋ بارىسىندا قارجى ءمينيسترى ءمادي تاكييەۆ 2026 جىلعا ارنالعان بيۋدجەتتىڭ نەگىزگى پارامەترلەرى تۋرالى باياندادى.
"2026 جىلعا ءتۇسىم 23،1 ترلن تەڭگە دەڭگەيىندە بولجانىپ وتىر. ونىڭ ىشىندە (ترانسفەرتتەردى ەسەپتەمەگەندە) كىرىس - 19،2 ترلن تەڭگە. ەكونوميكانىڭ وسىمىنە، جاڭا سالىق كودەكسى قابىلداۋىنا بايلانىستى بيىلمەن سالىستىرعاندا كىرىس 3،6 ترلن تەڭگەگە ارتىپ وتىر"، - دەدى مينيستر.بۇل رەتتە بيۋدجەت شىعىنى - 27،8 ترلن تەڭگە، ياعني بيىلمەن سالىستىرعاندا 2 ترلن تەڭگەگە ارتىق. ءمادي تاكييەۆ 2026 جىلى بيۋدجەت تاپشىلىعى جالپى ىشكى ونىمگە شاققاندا 2،5% دەڭگەيىندە، ال 2028 جىلعا قاراي 0،9%-عا دەيىن تومەندەۋى بولجانىپ وتىرعانىن اتاپ ءوتتى.
سونىمەن قاتار، ۇكىمەت 2026 جىلعى بيۋدجەتتىڭ نەگىزگى باعىتتارىنا قانشا قاراجات بولىنەتىنىن انىقتاعان:
- قارجى مينيسترلىگىنىڭ مالىمەتىنشە، دەنساۋلىق ساقتاۋ سالاسىنا 2،7 ترلن تەڭگە قاراستىرىلعان. بيىلمەن سالىستىرعاندا بۇل قاراجات 107 ملرد تەڭگەگە ارتىق.
- ءبىلىم جانە عىلىم سالاسىنا 901،7 ملرد تەڭگە جوسپارلانىپ وتىر.
- 2026 جىلى مادەنيەت، تۋريزم جانە سپورتتى دامىتۋعا 263،5 ملرد تەڭگە قاراستىرىلعان.
- 2026 جىلى ەكونوميكانى ىنتالاندىرۋعا شامامەن 1،2 ترلن تەڭگە جوسپارلانىپ وتىر، ال ناقتى سەكتوردى دامىتۋعا جۇمسالاتىن قاراجاتتىڭ جالپى كولەمى 540 ملرد تەڭگەگە ارتىپ، 3،7 ترلن تەڭگە بولادى.
- وڭىرلەردى دامىتۋعا 2026-2028 جىلدارعا 581 ملرد تەڭگە قاراستىرىلعان، ونىڭ ىشىندە 2026 جىلى – 300 ملرد تەڭگە.
- كۇشتىك قۇرىلىم بلوگىنا 2026 جىلى 3 ترلن تەڭگە بولىنەدى، بۇل بيىلمەن سالىستىرعاندا 335 ملرد تەڭگەگە ارتىق.
