اقتوبە وبلىسىنىڭ اكىمى اسحات شاحاروۆتىڭ توراعالىعىمەن وتكەن وتىرىستا ەرەكشە ءبىلىم بەرۋدى قاجەت ەتەتىن بالالارعا تەڭ ءبىلىم الۋ مۇمكىندىگىن قامتاماسىز ەتۋ ماسەلەسى تالقىلاندى، دەپ حابارلايدى Dalanews.kz.
وبلىستىق ءبىلىم باسقارماسىنىڭ باسشىسى بۇلبۇل قۇزەمبايەۆانىڭ مالىمەتىنشە، وڭىردە 9 753 مۇمكىندىگى شەكتەۋلى بالا تىركەلگەن. ولاردىڭ ءبىلىم الۋىن قولداۋ ماقساتىندا 31 ارنايى ۇيىم جۇمىس ىستەيدى. اتاپ ايتقاندا، 5 پسيحولوگيالىق-مەديسينالىق-پەداگوگيكالىق كونسۋلتاسيا (پمپك)، 15 تۇزەتۋ كابينەتى، 3 ارنايى مەكتەپ جانە ءاۋتيزمى بار بالالارعا ارنالعان ورتالىق قىزمەت كورسەتەدى.
قازىرگى ۋاقىتتا وبلىستاعى 92 بالاباقشادا 547 ينكليۋزيۆتى توپ، ال 347 مەكتەپتە 1 070 ينكليۋزيۆتى سىنىپ بار. وندا 3 811 بالا ءبىلىم الۋدا. سونىمەن قاتار، 189 ارنايى پەداگوگ پەن 450-دەن استام كومەكشى مامان ەڭبەك ەتىپ جاتىر.
سوڭعى جىلدارى بىرنەشە ءىرى جوبا جۇزەگە اسقان. «اقبوتا» جانە وبلىستىق ارنايى بالاباقشاعا كۇردەلى جوندەۋ جۇرگىزىلگەن، 136 ورىندىق «جۇلدىز» جاڭا بالاباقشاسى پايدالانۋعا بەرىلگەن. قازىرگى ۋاقىتتا تاعى ەكى نىساننىڭ قۇرىلىسى ءجۇرىپ جاتىر.
باسقارما باسشىسى ءبىرقاتار وزەكتى ماسەلەگەدە توقتالدى. اتاپ ايتقاندا، دەفەكتولوگتارمەن لوگوپەدتەردىڭ جەتىسپەۋشىلىگى، پمپك جۇمىسىنىڭ شامادان تىس جۇكتەلۋى جانە ارنايى بالاباقشالارعا كەزەكتە تۇرعان 501 بالانىڭ بارى – شەشىمىن قاجەت ەتەتىن ماسەلەلەر قاتارىندا.
وبلىس اكىمى اسحات شاحاروۆ ەمبى قالاسىندا جاڭا پمپك اشۋ جۇمىستارىن جەدەلدەتۋدى، ق.جۇبانوۆ اتىنداعى ءاوۋ مەن اقتوبە گۋمانيتارلىق كوللەدجىندە ارنايى ماماندار دايارلاۋ باعدارلامالارىن قايتا قاراۋدى جانە پەداگوگتەردى ىنتالاندىرۋ شارالارىن كۇشەيتۋدى تاپسىردى.
«ءاربىر بالانىڭ ساپالى ءبىلىم الۋعا مەن دامۋعا قۇقىعى بار. بۇل – قوعامنىڭ كەمەلدىگىن كورسەتەتىن ماڭىزدى كورسەتكىش»، – دەدى ءوڭىر باسشىسى.
