قازاقستاندىق بلوگەر الىشەر ەلىكبايەۆ وزىنە تۇسكەن تابىستان 5 ملن تەڭگە سالىق تولەۋدى تالاپ ەتكەن قارجى مينيسترلىگى مەملەكەتتىك كىرىستەر كوميتەتىمەن جارتى جىل سوتتاسىپ، اقىرى ادىلدىككە جەتكەنىن مالىمدەدى، دەپ حابارلايدى Dalanews.kz.

ەستەرىڭىزدە بولسا، اقپان ايىندا قازاقستاندا جۇزدەگەن بلوگەر سالىق ورگاندارىنان حابارلاما العانى بەلگىلى.

"بىرنەشە جولداسىما 1 ملرد تەڭگە، ونداعان ينفليۋەنسەردەگى دوستارىما 100 ملن تەڭگە، ال وزگە باسىم بولىگىنە 20-دان 100 ميلليون تەڭگەگە دەيىن سالىق تولەۋدى تالاپ ەتكەن حابارلاما كەلگەن، ال مىنا پاقىرلارىڭىزعا ەكى جىلعا بار-جوعى 5 ميلليون تەڭگە جازىپتى"، - دەپ جازادى قاعىتا بلوگەر Facebook-تەگى پاراقشاسىندا.

ەلىكبايەۆتىڭ ايتۋىنشا، ونىڭ الدىنا تارتىلعان سومالار ءوز پاراقشاسىنا جازىلۋشىلارمەن بىرلەسىپ ۇيىمداستىرعان قايىرىمدىلىق الىمدارىمەن بايلانىستى. سونداي جوبالاردىڭ قاتارىندا بالالار حوسپيسىنە رەانيموبيل ساتىپ الۋ، مينسكىدە ناۋقاستارعا بۇيرەك ترانسپلانتاسياسى بويىنشا كومەك كورسەتۋ، سونداي-اق ۋكراينادا دارىگەرلەرگە مەديسينالىق جابدىقتار ساتىپ الۋ سىندى قايىرىمدىلىق اكسيالارى كىرەدى.

"بۇل الىمدارعا سالىق سالىنبايدى، ويتكەنى بۇل مەنىڭ كىرىستەرىم ەمەس، اقشا قايىرىمدىلىق قورلارىنا، كلينيكالارعا، اۆتووندىرۋشىلەرگە نەمەسە مەديسينالىق جابدىقتاردىڭ ديستريبيۋتورلارىنا ءتۇستى"، - دەيدى ەلىكبايەۆ.

ول سالىق قىزمەتكەرلەرىنىڭ قابىلداۋىندا بولىپ، ولارعا قانشا اقشا جينالعانىن، قانشاسىنا قايىرىمدىلىق زاتى ساتىپ الىنعانى جانە ونى تاپسىرۋ ساتتەرىن ايعاقتايتىن قۇجاتتاردى ۇسىنعانىن ايتادى. الايدا، ونىڭ ايتۋىنشا، بۇل دالەلدەر مەملەكەتتىك كىرىستەر كوميتەتىنىڭ ءبىر دە ءبىر دەڭگەيىندە ەسكەرىلمەگەن. سول سەبەپتى الىشەر ەلىكبايەۆ سوتقا جۇگىنۋ تۋرالى شەشىم قابىلدايدى.

جارتى جىل ۋاقىت كەتكەن سوتتا اقىرىندا: "سالىق ورگانى قىزمەتكەرلەرىنىڭ ارەكەتتەرى زاڭسىز دەپ تانىلسىن،  تولىققاندى سالىقتىق تەكسەرۋدەن باس تارتىلسىن" دەلىنگەن شەشىم شىعارىلدى.  

ايتا كەتسەك، 2025 جىلدىڭ اقپان ايىندا مەملەكەتتىك كىرىستەر كوميتەتى 594 بلوگەرگە 53،3 ملرد تەڭگە سوماسىنا "كىرىستەردى تومەندەتىپ كورسەتۋ" بويىنشا بۇزۋشىلىقتارعا جول بەرگەنى تۋرالى حابارلامالار جولدادى. ال بىرنەشە كۇننەن كەيىن ۆەدومستۆو حابارلامالاردى جىبەرۋ كەزىندە تەحنيكالىق اقاۋلار بولعانىن مالىمدەدى، سودان كەيىن مكك 9،8 ملرد تەڭگەگە 93 بلوگەرگە جىبەرىلگەن 169 حابارلامانى كەرى قايتارىپ الدى. الايدا، اقپان ايىنىڭ سوڭىندا كوميتەت 854 بلوگەرگە 71،9 ملرد تەڭگە سوماسىنا "كىرىستەردى تومەندەتۋ" بۇزۋشىلىقتارى بويىنشا كامەرالدىق باقىلاۋ حابارلامالارى جولدانعانىن مالىمدەدى. بۇل رەتتە كورسەتىلگەن سومانى سالىق ورگانى تولەنبەگەن سالىقتاردىڭ سوماسى ەمەس، بلوگەرلەردىڭ سالىق دەكلاراسيالارىندا كورسەتىلمەگەن بولجامدى كىرىستەر ەكەنىن ناقتىلادى.