شىمكەنتتە بۇرىن “تۇرعىن ءۇي شىمكەنت” ج ش س ديرەكتورى قىزمەتىن اتقارعان، 31 جاستاعى ەرنار جيەمبايدىڭ ءىسى بويىنشا سوت پروسەسى جالعاسىپ جاتىر، دەپ حابارلايدى Dalanews.kz.
قورعاۋ تاراپى تەرگەۋدىڭ ءبىرجاقتى جۇرگىزىلگەنىن جانە ورەسكەل زاڭبۇزۋشىلىقتارعا جول بەرىلگەنىن العا تارتتى.
ادۆوكات مۇساقۇلوۆتىڭ ايتۋىنشا، وقيعا ورنىنان الىنعان وق-دارىلەر (وقتار) اۋىستىرىلعان بولۋى ىقتيمال. سول سەبەپتى ول ساراپتاما قورىتىندىلارىنىڭ ءبىر بولىگىن ءىس ماتەريالدارىنان الىپ تاستاۋدى سۇرادى.
ايىپتالۋشىنىڭ اكەسى پيرالييەۆ تە ءىستىڭ قولدان جاسالعانىنا سەنىمدى. ونىڭ سوزىنشە، جابىرلەنۋشىنىڭ دەنەسىنەن الىنعان بىتىرا سانى دۇرىس ەسەپكە الىنباعان. ول رۋسلان بەردەنوۆتىڭ اۋرۋحاناداعى مەديسينالىق دەرەكتەرىن سۇراتۋدى تالاپ ەتتى. بەردەنوۆتىڭ ءوزى دە دەنەسىندە ءالى شامامەن 60 بىتىرا قالعانىن ايتقان.
پروكۋراتۋرا ساراپتامانىڭ زاڭ تالاپتارىنا ساي جۇرگىزىلگەنىن، ال قايتالاما تەكسەرۋ ونىڭ ناتيجەلەرىن تولىق راستاعانىن مالىمدەدى.
سۋديا ءابىنۇر قارابايەۆ قورعاۋ تاراپىنىڭ ءوتىنىشىن اشىق قالدىرىپ، ونى ۇكىم شىعارۋ كەزىندە ەسكەرەتىنىن جەتكىزدى.
ەسكە سالايىق، بۇعان دەيىن شىمكەنت قالاسى اكىمىنىڭ ورىنباسارى رۋسلان بەردەنوۆ، بيىل ءساۋىر ايىندا وزىنە جاسالعان قارۋلى شابۋىلدان كەيىن، سوتتا جەكە كۋالىك بەرۋگە نيەتتى ەكەنىن جەتكىزگەن ەدى. بۇل تۋرالى ونىڭ وكىلى جەڭىس تىنىبەك مالىمدەدى.
تىنىبەكتىڭ ايتۋىنشا، 12 تامىزدا بەردەنوۆكە وتا جاسالعان. قازىرگى جاعدايى تۋرالى ناقتى مالىمەت جوق. دەگەنمەن ول دارىگەرلەر رۇقسات بەرگەن بويدا سوت زالىنا كەلىپ، بولعان جايتتى ەگجەي-تەگجەيلى ايتىپ بەرۋگە دايىن.
“بۇگىن وعان وپەراسيا جاسالدى. دارىگەرلەر رۇقسات ەتكەن ساتتە كۋالىك بەرەدى دەپ جوسپارلاپ وتىرمىز. ءوزى دە “سوتقا بارامىن، ءبارىن تولىق ايتىپ بەرەمىن” دەپ وتىر. جيەنبايدىڭ العاشقى سوتتا سويلەگەن 45 مينۋتتىق ءسوزىنىڭ بىردە-بىرى شىندىققا جاناسپايدى. ونىڭ ءوز ايەلىنە كۇيە جاعاتىن مالىمدەمەلەرى ورىنسىز”، – دەدى تىنىبەك.
سونىمەن قاتار جابىرلەنۋشىنىڭ وكىلى تەرگەۋ بارىسىندا ايىپتالۋشى جانە ونىڭ قورعاۋشىسىمەن كەزدەسكەنىن ايتتى. اڭگىمە كەزىندە قارسى تاراپ اقپاراتتىق شابۋىلمەن قورقىتقان.
“ولار بىزگە كەلىپ: “سوعىس بولادى” دەپ ەسكەرتتى. جارايدى، سوعىسىڭدار، ءبىز زاڭگەرمىز. “ەگەر قارسى ۇسىنىس بولماسا، سوعىس باستالادى. اقپاراتتىق تۇرعىدان قۇرتامىز، بەردەنوۆتىڭ مانسابىنا نۇكتە قويامىز” دەپ اشىق ايتتى”، – دەدى ول.
