Shymkentte buryn “Turǵyn úi Shymkent” JShS direktory qyzmetin atqarǵan, 31 jastaǵy Ernar Jiembaidyń isi boiynsha sot protsesi jalǵasyp jatyr, dep habarlaidy Dalanews.kz.
Qorǵaý tarapy tergeýdiń birjaqty júrgizilgenin jáne óreskel zańbuzýshylyqtarǵa jol berilgenin alǵa tartty.
Advokat Musaqulovtyń aitýynsha, oqiǵa ornynan alynǵan oq-dáriler (oqtar) aýystyrylǵan bolýy yqtimal. Sol sebepti ol saraptama qorytyndylarynyń bir bóligin is materialdarynan alyp tastaýdy surady.
Aiyptalýshynyń ákesi Piraliev te istiń qoldan jasalǵanyna senimdi. Onyń sózinshe, jábirlenýshiniń denesinen alynǵan bytyra sany durys esepke alynbaǵan. Ol Rýslan Berdenovtiń aýrýhanadaǵy meditsinalyq derekterin suratýdy talap etti. Berdenovtiń ózi de denesinde áli shamamen 60 bytyra qalǵanyn aitqan.
Prokýratýra saraptamanyń zań talaptaryna sai júrgizilgenin, al qaitalama tekserý onyń nátijelerin tolyq rastaǵanyn málimdedi.
Sýdia Ábinur Qarabaev qorǵaý tarapynyń ótinishin ashyq qaldyryp, ony úkim shyǵarý kezinde eskeretinin jetkizdi.
Eske salaiyq, buǵan deiin Shymkent qalasy ákiminiń orynbasary Rýslan Berdenov, biyl sáýir aiynda ózine jasalǵan qarýly shabýyldan keiin, sotta jeke kýálik berýge nietti ekenin jetkizgen edi. Bul týraly onyń ókili Jeńis Tynybek málimdedi.
Tynybektiń aitýynsha, 12 tamyzda Berdenovke ota jasalǵan. Qazirgi jaǵdaiy týraly naqty málimet joq. Degenmen ol dárigerler ruqsat bergen boida sot zalyna kelip, bolǵan jaitty egjei-tegjeili aityp berýge daiyn.
“Búgin oǵan operatsiia jasaldy. Dárigerler ruqsat etken sátte kýálik beredi dep josparlap otyrmyz. Ózi de “sotqa baramyn, bárin tolyq aityp beremin” dep otyr. Jienbaidyń alǵashqy sotta sóilegen 45 minýttyq sóziniń birde-biri shyndyqqa janaspaidy. Onyń óz áieline kúie jaǵatyn málimdemeleri orynsyz”, – dedi Tynybek.
Sonymen qatar jábirlenýshiniń ókili tergeý barysynda aiyptalýshy jáne onyń qorǵaýshysymen kezdeskenin aitty. Áńgime kezinde qarsy tarap aqparattyq shabýylmen qorqytqan.
“Olar bizge kelip: “Soǵys bolady” dep eskertti. Jaraidy, soǵysyńdar, biz zańgermiz. “Eger qarsy usynys bolmasa, soǵys bastalady. Aqparattyq turǵydan qurtamyz, Berdenovtiń mansabyna núkte qoiamyz” dep ashyq aitty”, – dedi ol.
