استانا قالاسىنىڭ اكىمى جەڭىس قاسىمبەك ستۋدەنتتەردى جاتاقحانامەن قامتاماسىز ەتۋ جۇمىستارى تۋرالى Instagram پاراقشاسىندا مالىمدەدى،- دەپ حابارلايدى Dalanews.kz
اكىمنىڭ ايتۋىنشا، جاڭا وقۋ جىلىنىڭ باستالۋىنا از ۋاقىت قالسا دا، الەۋمەتتىك نىسانداردى اشۋعا دايىندىق قارقىندى ءجۇرىپ جاتىر. بۇل باعىتتا سالالىق مينيسترلىك، جوعارى وقۋ ورىندارى جانە ينۆەستورلارمەن بىرلەسىپ، جاتاقحانا ورىندارىن كوبەيتۋ جۇمىستارى جۇرگىزىلۋدە.
عىلىم جانە جوعارى ءبىلىم ءمينيسترى ساياسات نۇربەكپەن بىرگە قالا باسشىسى ا.پۋشكين كوشەسى، 13ا مەكەنجايىندا ورنالاسقان، جەكە ينۆەستيسيا ەسەبىنەن سالىنعان 400 ورىندىق جاڭا جاتاقحانانى ارالاپ كوردى.
2025 جىلدىڭ باسىنان بەرى ەلوردادا شامامەن 2 700 ورىندىق جاتاقحانا پايدالانۋعا بەرىلگەن. جىل سوڭىنا دەيىن تاعى 2 060 ورىنعا ارنالعان 7 نىسان اشۋ جوسپارلانىپ وتىر. وسىلايشا، بيىل جالپى سىيىمدىلىعى 4 716 ورىندىق 8 ستۋدەنتتىك جاتاقحانا ىسكە قوسىلادى.
وتكەن جىلى استانادا 1 700 ورىندىق 5 جاتاقحانا پايدالانۋعا بەرىلگەن بولاتىن.
سونىمەن قاتار، جاڭا وقۋ جىلى اياسىندا قالادا 15 مەكتەپ اشىلادى، ونىڭ 7-ەۋى «جايلى مەكتەپ» ۇلتتىق جوباسى بويىنشا سالىنۋدا. بۇل قوسىمشا 28 مىڭ وقۋشى ورنىن قامتاماسىز ەتەدى. بۇدان بولەك، ەلوردادا بالاباقشالار، وقۋشىلار سارايى جانە وزگە دە الەۋمەتتىك نىساندار بوي كوتەرۋدە.
