شەرزات بولات ىسىندە اتى اتالعان 4 كۋاگەرگە قاتىستى جەكە قاۋلى ازىرگە زاڭدى كۇشىنە ەنگەن جوق. بۇل تۋرالى الماتى وبلىسىنىڭ پروكۋراتۋراسى مالىمدەدى، دەپ حابارلايدى Dalanews.kz.
ۆەدومستۆونىڭ مالىمەتىنشە، 2025 جىلدىڭ 5 ماۋسىمىندا وبلىستىق مامانداندىرىلعان اۋدانارالىق سوت شىعارعان جەكە قاۋلىعا تاراپتار اپەللياسيالىق شاعىم تۇسىرگەن.
“ق ر قىلمىستىق-پروسەستىك كودەكسىنىڭ 414-بابىنا سايكەس، سوت اكتىسىنە اپەللياسيالىق شاعىم بەرىلگەن جاعدايدا ول زاڭدى كۇشىنە ەنبەي قالادى. قازىرگى ۋاقىتتا قىلمىستىق ءىس وبلىستىق سوتتىڭ قاراۋىندا. پروسەسسۋالدىق شەشىم جەكە قاۋلى زاڭدى كۇشىنە ەنگەننەن كەيىن عانا قابىلدانادى”، – دەپ مالىمدەدى پروكۋراتۋرا.
ايتا كەتەيىك، شەرزات ىسىنە قاتىستى سوتتالعانداردىڭ ءبىرى بوستاندىققا شىقتى. بۇل تۋرالى ادۆوكات مەيىرمان شەكەيەۆ مالىمدەدى.
"دۋمان ىسقاق ءبىرىنشى ساتىداعى ۇكىمدەگى جازانى وتەپ قويعاندىقتان الماتى وبلىستىق سوتىنىڭ قىلمىستىق ىستەر جونىندەگى سوت القاسىنىڭ سۋدياسى مۇسابەكوۆانىڭ 2025 جىلعى 23 شىلدەدەگى سوت قاۋلىسىمەن بۇلتارتپاۋ شاراسى جويىلىپ، قاماۋدان بوساتىلدى"، – دەيدى ادۆوكات مەيىرمان شەكەيەۆ.
سونىمەن قاتار ادۆوكات اپەللياسيالىق سوت قاشان وتەتىنىن ايتتى.
مەيىرمان شەكەيەۆتىڭ سوزىنشە، شەرزات ءىسى بويىنشا اپەللياسيالىق سوت 18 تامىزدا ساعات 11:00-دە الماتى وبلىسى سوتىنىڭ عيماراتىندا وتەدى.
ەسكە سالايىق، بۇعان دەيىن شەرزات بولاتتى ءولتىردى دەگەن كۇدىكتىلەردىڭ جەتەۋى اپەللياسيالىق شاعىم تۇسىرگەن ەدى.
ادۆوكاتتىڭ ايتۋىنشا، 21 ماۋسىم كۇنى سوت ۇكىمى زاڭدى كۇشىنە ەنگەن. سول كۇننەن باستاپ، سونداي-اق سوتتالۋشىلار ۇكىمدى قولدارىنا العان كۇننەن كەيىنگى 15 تاۋلىك ىشىندە شاعىم تۇسىرۋگە قۇقىقتارى بار.
"ءقازىردىڭ وزىندە سوتتالۋشىلار مەن ولاردىڭ قورعاۋشىلارىنىڭ باسىم بولىگىنەن اپەللياسيالىق شاعىم كەلىپ ءتۇستى. تەك شىڭعىس بەلعوجايەۆ پەن كامەلەتكە تولماعان دۋمان ىسقاقتان باسقا بارلىق سوتتالۋشى شاعىم تۇسىرگەن. اپەللياسيالىق سوت وتىرىسىنىڭ ناقتى كۇنى كەيىنىرەك حابارلانادى"، – دەدى قورعاۋشى.
بيىل 5 ماۋسىمدا تالعار اۋداندىق سوتىندا كىسى قولىنان قازا تاپقان ءجاسوسپىرىم شەرزات پولاتتىڭ ولىمىنە قاتىستى ۇكىم شىققان بولاتىن. سوت پروسەسىن سۋديا ەرجان جانۇزاقوۆ جۇرگىزدى.
سوت ۇكىمىمەن:
- ابزال شىناسىل – 23 جىلعا،
- راۆيل ساكييەۆ – 20 جىلعا،
- ازامات توقتاۋبايەۆ – 15 جىلعا،
- نۇرقياس ءىلياسوۆ – 9 جىلعا (بۇعان دەيىنگى 2،5 جىل شەكتەۋ جازاسىن ەسكەرە وتىرىپ)،
- شىڭعىس بەلعوجايەۆ، دارحان اسكەنتاي، نۇربول توقتاۋبايەۆ، ديدار قالياحمەت – ءارقايسىسى 7 جىلعا سوتتالدى،
ال دۋمان ىسقاق ق ر قىلمىستىق كودەكسىنىڭ 434-بابى (اۋىر قىلمىس جاسالعانىن حابارلاماۋ) بويىنشا 1،5 جىلعا باس بوستاندىعىنان ايىرىلدى. ونىڭ يزولياتورداعى ءبىر كۇنى ەكى كۇن رەتىندە ەسەپتەلەتىن بولدى.
