Sherzat Bolat isinde aty atalǵan 4 kýágerge qatysty jeke qaýly ázirge zańdy kúshine engen joq. Bul týraly Almaty oblysynyń prokýratýrasy málimdedi, dep habarlaidy Dalanews.kz.
Vedomstvonyń málimetinshe, 2025 jyldyń 5 maýsymynda oblystyq mamandandyrylǵan aýdanaralyq sot shyǵarǵan jeke qaýlyǵa taraptar apelliatsiialyq shaǵym túsirgen.
“QR Qylmystyq-protsestik kodeksiniń 414-babyna sáikes, sot aktisine apelliatsiialyq shaǵym berilgen jaǵdaida ol zańdy kúshine enbei qalady. Qazirgi ýaqytta qylmystyq is oblystyq sottyń qaraýynda. Protsessýaldyq sheshim jeke qaýly zańdy kúshine engennen keiin ǵana qabyldanady”, – dep málimdedi prokýratýra.
Aita keteiik, Sherzat isine qatysty sottalǵandardyń biri bostandyqqa shyqty. Bul týraly advokat Meiirman Shekeev málimdedi.
"Dýman Ysqaq birinshi satydaǵy úkimdegi jazany ótep qoiǵandyqtan Almaty oblystyq sotynyń qylmystyq ister jónindegi sot alqasynyń sýdiasy Musabekovanyń 2025 jylǵy 23 shildedegi sot qaýlysymen bultartpaý sharasy joiylyp, qamaýdan bosatyldy", – deidi advokat Meiirman Shekeev.
Sonymen qatar advokat apelliatsiialyq sot qashan ótetinin aitty.
Meiirman Shekeevtiń sózinshe, Sherzat isi boiynsha apelliatsiialyq sot 18 tamyzda saǵat 11:00-de Almaty oblysy sotynyń ǵimaratynda ótedi.
Eske salaiyq, buǵan deiin Sherzat Bolatty óltirdi degen kúdiktilerdiń jeteýi apelliatsiialyq shaǵym túsirgen edi.
Advokattyń aitýynsha, 21 maýsym kúni sot úkimi zańdy kúshine engen. Sol kúnnen bastap, sondai-aq sottalýshylar úkimdi qoldaryna alǵan kúnnen keiingi 15 táýlik ishinde shaǵym túsirýge quqyqtary bar.
"Qazirdiń ózinde sottalýshylar men olardyń qorǵaýshylarynyń basym bóliginen apelliatsiialyq shaǵym kelip tústi. Tek Shyńǵys Belǵojaev pen kámeletke tolmaǵan Dýman Ysqaqtan basqa barlyq sottalýshy shaǵym túsirgen. Apelliatsiialyq sot otyrysynyń naqty kúni keiinirek habarlanady", – dedi qorǵaýshy.
Biyl 5 maýsymda Talǵar aýdandyq sotynda kisi qolynan qaza tapqan jasóspirim Sherzat Polattyń ólimine qatysty úkim shyqqan bolatyn. Sot protsesin sýdia Erjan Januzaqov júrgizdi.
Sot úkimimen:
- Abzal Shynasyl – 23 jylǵa,
- Ravil Sakiev – 20 jylǵa,
- Azamat Toqtaýbaev – 15 jylǵa,
- Nurqiias Iliiasov – 9 jylǵa (buǵan deiingi 2,5 jyl shekteý jazasyn eskere otyryp),
- Shyńǵys Belǵojaev, Darhan Áskentai, Nurbol Toqtaýbaev, Didar Qaliahmet – árqaisysy 7 jylǵa sottaldy,
Al Dýman Ysqaq QR Qylmystyq kodeksiniń 434-baby (aýyr qylmys jasalǵanyn habarlamaý) boiynsha 1,5 jylǵa bas bostandyǵynan aiyryldy. Onyń izoliatordaǵy bir kúni eki kún retinde esepteletin boldy.
