جەتىسۋ وبلىسى قۇرىلعاننان بەرى وبلىستا 276 الەۋمەتتىك ينفراقۇرىلىم نىسانى سالىندى جانە جوندەلدى، سونىڭ 104ء-ى بيىلعى جىلدىڭ ۇلەسىندە. سونىڭ ناتيجەسىندە الەۋمەتتىك ينفراقۇرىلىم نىساندارىنىڭ جاڭارۋ دەڭگەيى 55،8%-عا جەتپەك،- دەپ حابارلايدى Dalanews.kz
ءبىلىم بەرۋ سالاسىندا 2002-2025 جىلدارى 41 مەكتەپ جاڭاردى، سونىڭ ىشىندە بيىل 4 جاڭا مەكتەپ سالىنسا، 6-ۋى كۇردەلى قۇرىلىستان كەيىن پايدالانۋعا بەرىلەدى.
سوڭعى ءۇش جىلدا دەنساۋلىق ساقتاۋ سالاسىندا 162 جوبا قولعا الىندى، بۇل رەتتە 75 نىساننىڭ قۇرىلىسى بيىل اياقتالادى، سونىڭ 44ء-ى - «اۋىلداعى دەنساۋلىق ساقتاۋدى جاڭعىرتۋ» ۇلتتىق جوباسى اياسىندا سالىنۋدا.
سپورت سالاسىندا كورسەتىلگەن مەرزىم ىشىندە 39 نىسان قولدانىسقا بەرىلسە، بيىل 7 نىسان، اتاپ ايتقاندا دەنە شىنىقتىرۋ-ساۋىقتىرۋ كەشەنى، كوركەم گيمناستيكا زالى، بلوكتى-موبۋلدى سپورت كەشەندەرى ەل يگىلىگىنە ۇسىنىلادى. سونىڭ ناتيجەسىندە حالىقتى سپورت ينفراقۇرىلىمىمەن قامتۋ 64%، دەنە شىنىقتىرۋمەن جانە سپورتپەن اينالىساتىن تۇرعىندار سانى 42% جەتتى. ال مادەنيەت سالاسىندا جىل سوڭىندا وبلىس قۇرىلعاننان بەرى جاڭعىرتىلعان نىساندار سانى 34-كە بارادى.
جەرگىلىكتى تۇرعىنداردىڭ ايتۋىنشا، زاماناۋي الەۋمەتتىك نىسانداردىڭ سالىنۋى، اسىرەسە، اۋىلدىق جەرلەردە حالىقتىڭ ءومىر ءسۇرۋ ساپاسىن ايتارلىقتاي جاقسارتتى.
– 1970ء-شى جىلداردىڭ باسىنان زەينەتكە شىققانعا دەيىن وسى اۋىلدا مەدبيكە بولىپ جۇمىس ىستەدىم. ول كەزدە مۇندا بار-جوعى ءبىر اكۋشەر مەن ءبىر فەلدشەر قىزمەت كورسەتەتىن شاعىن مەديسينالىق پۋنكت بولاتىن. ءقازىر بىزگە دارىگەرلىك امبۋلاتوريا سالىپ بەردى. قىزمەت كورسەتەتىن مەديسينا قىزمەتكەرلەرىنىڭ سانى دا ەداۋىر ارتتى. ءقازىر امبۋلاتوريا زاماناۋي مەديسينالىق قۇرالدارمەن، اپپاراتتارمەن جابدىقتالعان. بۇرىن اناليزدەردى جاركەنتكە اپارىپ تاپسىرۋعا تۋرا كەلەتىن. ەندى تۇرعىنداردىڭ قارالۋىنا دا، مەديسينا قىزمەتكەرلەرىنىڭ جۇمىس ىستەۋىنە دە وتە قولايلى جاعداي جاسالىپ وتىر، – دەيدى پانفيلوۆ اۋدانىنا قاراستى اقجازىق اۋىلىنىڭ تۇرعىنى ءباعداعۇل احمەتوۆا.
جالپى، وتكەن جىلى قۇرىلىس جۇمىستارىنىڭ كولەمى 2022 جىلمەن سالىستىرعاندا 2،9 ەسە ءوستى. بۇل رەتتە حالىقتى تۇرعىن ۇيمەن قامتۋعا دا ەرەكشە ءمان بەرىلدى. ءۇش جىل ىشىندە شامامەن 1 ملن. شارشى مەتر تۇرعىن ءۇي نەمەسە 4994 پاتەرلىك 295 ءۇي پايدالانۋعا بەرىلدى.
