Jetisý oblysy qurylǵannan beri oblysta 276 áleýmettik infraqurylym nysany salyndy jáne jóndeldi, sonyń 104-i biylǵy jyldyń úlesinde. Sonyń nátijesinde áleýmettik infraqurylym nysandarynyń jańarý deńgeii 55,8%-ǵa jetpek,- dep habarlaidy Dalanews.kz
Bilim berý salasynda 2002-2025 jyldary 41 mektep jańardy, sonyń ishinde biyl 4 jańa mektep salynsa, 6-ýy kúrdeli qurylystan keiin paidalanýǵa beriledi.
Sońǵy úsh jylda densaýlyq saqtaý salasynda 162 joba qolǵa alyndy, bul rette 75 nysannyń qurylysy biyl aiaqtalady, sonyń 44-i - «Aýyldaǵy densaýlyq saqtaýdy jańǵyrtý» ulttyq jobasy aiasynda salynýda.
Sport salasynda kórsetilgen merzim ishinde 39 nysan qoldanysqa berilse, biyl 7 nysan, atap aitqanda dene shynyqtyrý-saýyqtyrý kesheni, kórkem gimnastika zaly, blokty-mobýldi sport keshenderi el igiligine usynylady. Sonyń nátijesinde halyqty sport infraqurylymymen qamtý 64%, dene shynyqtyrýmen jáne sportpen ainalysatyn turǵyndar sany 42% jetti. Al mádeniet salasynda jyl sońynda oblys qurylǵannan beri jańǵyrtylǵan nysandar sany 34-ke barady.
Jergilikti turǵyndardyń aitýynsha, zamanaýi áleýmettik nysandardyń salynýy, ásirese, aýyldyq jerlerde halyqtyń ómir súrý sapasyn aitarlyqtai jaqsartty.
– 1970-shi jyldardyń basynan zeinetke shyqqanǵa deiin osy aýylda medbike bolyp jumys istedim. Ol kezde munda bar-joǵy bir akýsher men bir feldsher qyzmet kórsetetin shaǵyn meditsinalyq pýnkt bolatyn. Qazir bizge dárigerlik ambýlatoriia salyp berdi. Qyzmet kórsetetin meditsina qyzmetkerleriniń sany da edáýir artty. Qazir ambýlatoriia zamanaýi meditsinalyq quraldarmen, apparattarmen jabdyqtalǵan. Buryn analizderdi Jarkentke aparyp tapsyrýǵa týra keletin. Endi turǵyndardyń qaralýyna da, meditsina qyzmetkerleriniń jumys isteýine de óte qolaily jaǵdai jasalyp otyr, – deidi Panfilov aýdanyna qarasty Aqjazyq aýylynyń turǵyny Baǵdaǵúl Ahmetova.
Jalpy, ótken jyly qurylys jumystarynyń kólemi 2022 jylmen salystyrǵanda 2,9 ese ósti. Bul rette halyqty turǵyn úimen qamtýǵa da erekshe mán berildi. Úsh jyl ishinde shamamen 1 mln. sharshy metr turǵyn úi nemese 4994 páterlik 295 úi paidalanýǵa berildi.
