كاسىپكەرلىكتى قولداۋ، نەگىزگى ۇلتتىق جانە ينۆەستيسيالىق جوبالاردى ىسكە اسىرۋ ءۇشىن «بايتەرەك» حولدينگى 8 ترلن تەڭگە بولەدى. ول بيىل ەلىمىزدە ءجىو-نىڭ ناقتى وسىمىنە قوسىمشا 1،3% ۇلەس قوسادى دەپ كۇتىلەدى، دەپ حابارلايدى Dalanews.kz.
ۇكىمەتتە پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك ءجۇمانعاريننىڭ توراعالىعىمەن وتكەن قازاقستان ەكونوميكاسىنىڭ ءوسۋىن قامتاماسىز ەتۋ جونىندەگى شتاب وتىرىسىندا «بايتەرەك» حولدينگىنىڭ نەگىزگى ەكونوميكالىق كورسەتكىشتەرى مەن ينۆەستيسيالىق جوبالارى قارالدى.
ۇكىمەت ەكونوميكانىڭ ناقتى سەكتورىن قارقىندى دامىتۋ ماقساتىندا «بايتەرەك» حولدينگىن كاپيتالداندىرۋدى 1 ترلن تەڭگەگە ۇلعايتىپ وتىر. بۇل حولدينگكە كاسىپكەرلىكتى قولداۋعا، تۇرعىن ءۇي قۇرىلىسىن دامىتۋعا جانە نەگىزگى ۇلتتىق جانە ينۆەستيسيالىق جوبالاردى ىسكە اسىرۋعا شامامەن 8 ترلن تەڭگە بولۋگە مۇمكىندىك بەرەدى. شتاب وتىرىسىندا حولدينگ ءتوراعاسىنىڭ ورىنباسارى جاندوس شايحى ءبىرىنشى توقساندا 1،2 ترلن تەڭگە يگەرىلگەنىن ايتتى. ال جوسپار بويىنشا 1 ترلن تەڭگە بولاتىن. بۇدان باسقا، بيىل «بايتەرەك» ارقىلى ىسكە قوسىلاتىن جوبالاردىڭ جالپى قوسىلعان قۇنىنىڭ كولەمى 521،5 ملرد تەڭگە.
جوبالاردىڭ ەڭ ۇلكەن ينۆەستيسيالىق پۋلى قازاقستاننىڭ دامۋ بانكىندە شوعىرلانعان. بيىل 2،2 ترلن تەڭگەگە 66 جوبا جۇزەگە اسىرىلادى. ينۆەستيسيا سالىنعان نەگىزگى سالالار – كولىك، لوگيستيكا جانە بايلانىس (34%)، مەتاللۋرگيا (19%)، حيميا ونەركاسىبى (12%). جوبالاردىڭ بارلىعىنا قارجى بولىنگەن سوڭ، ەل ەكونوميكاسىنا جاڭا ءوندىرىس، تاۋار مەن قىزمەت تۇرىندە 37،8 ترلن تەڭگە مولشەرىندە سالىم تۇسىرىلەدى. نەگىزگى كاپيتالعا سالىنعان ينۆەستيسيا بيىل 1،6 ترلن تەڭگە. 2025 جىلى قارجى ءبولۋ جوسپارلانعان قدب-نىڭ باستى ينۆەستيسيالىق جوبالارىنىڭ قاتارىندا جامبىل وبلىسىنداعى ناتريي ءسيانيدىن ءوندىرۋ زاۋىتى، تۇركىستان وبلىسىنداعى كۇكىرت قىشقىلى زاۋىتى، قوستاناي وبلىسىنداعى ىستىق بريكەتتەلگەن تەمىر ءوندىرۋ جونىندەگى ءىرى قازاقستاندىق كاسىپورىن جانە باسقالار بار.
وسى جىلى 1،5 ترلن تەڭگەنىڭ 181 ينۆەستيسيالىق جوباسى ونەركاسىپتى دامىتۋ قورىندا (ءودق) قالىپتاستىرىلدى. نەگىزگى سالالار – ينفراقۇرىلىمدى دامىتۋ (27%)، مەتاللۋرگيا (21%) جانە حيميا ونەركاسىبى (13%). ءودق-نىڭ بارلىق جوبالارىن قارجىلاندىرۋدىڭ قورىتىندىسىندا جالپى قوسىلعان قۇن كولەمى – 19،4 ترلن تەڭگە. نەگىزگى كاپيتالعا سالىنعان ينۆەستيسيا بيىل 1،44 ترلن تەڭگە بولدى. 2025 جىلى قارجىلاندىرۋ جوسپارلانعان ءودق باستى ينۆەستيسيالىق جوبالارىنىڭ قاتارىنا «گلوبال ترانس كومپانيا» ج ش س شەكارالىق تەمىر جول وتكەلىن سالۋ، «ەەك» اق ەنەرگوبلوگىن قايتا جاڭارتۋ، «Qarmet» اق ءوندىرىسىن جاڭعىرتۋ، «Rail Way Steel» ج ش س ەلەكترومەتاللۋرگيالىق زاۋىتىن سالۋ كىرەدى.
Qazaqstan Investment Corporation 2025 جىلى قارجىلاندىرۋى 2،8 ترلن تەڭگە دەڭگەيىندە بولۋى ءتيىس جقق-مەن 10 ينۆەستيسيالىق جوباعا شامامەن 500 ملرد تەڭگە سالۋدى جوسپارلاپ وتىر. بيىل نەگىزگى كاپيتالعا سالىنعان ينۆەستيسيا – 200 ملرد تەڭگە. وسى جىلعا ارنالعان QIC نەگىزگى 5 ينۆەستيسيالىق جوباسى – قاراعاندى وبلىسىندا مەتاللۋرگيالىق كلاستەردى دامىتۋ، «ارالسودا» ءجشس-نىڭ كالسيلەنگەن سوداسىن جانە «Batys Bitum» ءجشس-نىڭ بيتۋمىن، «اقتاۋ ەنەرگەتيكالىق كومپانياسى» ءجشس-نىڭ بۋ-گاز ەلەكتر ستانساسىن ءوندىرۋ زاۋىتىن سالۋ.
«دامۋ» قورى 2025 جىلى شاعىن جانە ورتا بيزنەسكە جەڭىلدىكپەن نەسيە بەرۋ كولەمىن 750 ملرد تەڭگەگە دەيىن ۇلعايتۋدى جوسپارلادى. بۇل 2024 جىلمەن سالىستىرعاندا 3 ەسەدەي ارتىق. 2025 جىلعى 1 توقساندا 755 كاسىپكەرگە 53 ملرد تەڭگە بەرىلدى. قارىزدارعا كەپىلدىك بەرۋ كولەمى 1400 ملرد تەڭگەگە دەيىن ارتتى. ءى توقساندا 160 ملرد تەڭگە سوماسىنا كەپىلدىكتەر بەرىلدى.
اگروونەركاسىپتىك كەشەندى قولداۋدا 2025 جىلعى 6 مامىرداعى جاعداي بويىنشا اگرارلىق نەسيە كورپوراسياسى 5،8 ملن گەكتار ەگىس القابىن قامتي وتىرىپ، كوكتەمگى ەگىس جۇمىسىنا قارجى بەرۋدىڭ جەڭىلدەتىلگەن باعدارلاماسى بويىنشا 363 ملرد تەڭگەگە 6 مىڭعا جۋىق فەرمەردىڭ ءوتىنىمىن قاناعاتتاندىردى.
شتاب وتىرىسىنىڭ قورىتىندىسىندا ۆيسە-پرەمەر قاراپايىم زاتتار ەكونوميكاسى باعدارلاماسى بويىنشا ينۆەستيسيالىق جوبالاردىڭ قىمبات يمپورتتى الماستىرۋعا جانە سول ارقىلى ينفلياسيانى تەجەۋگە مۇمكىندىك بەرەتىن ىشكى نارىقتا سۇرانىسقا يە تاۋارلار ءوندىرىسىنىڭ جەتكىلىكسىز ۇسىنىلعانىن اتاپ ءوتتى.
«ءبىز ەكونوميكانىڭ ناقتى سەكتورىن قولداۋ باعدارلاماسىنا باستاماشىلىق جاساعان كەزدە، ءىرى جوبالارمەن قاتار ۇلتتىق ەكونوميكا مينيسترلىگىنەن تۇرمىستىق حيميا، گيگيەنا، ىرىمشىكتەر، كونسەرۆىلەر، شۇجىقتار جانە تۇرعىندارىمىز اراسىندا سۇرانىسقا يە باسقا دا ونىمدەر ءوندىرىسىن جولعا قويۋ جوبالارى بويىنشا ينۆەستيسيالارعا تاپسىرىس جاريالادىق. قۇس ءوندىرۋ بويىنشا جاقسى ىلگەرىلەۋ بار ەكەنىن كورىپ وتىرمىز. جىل سوڭىنا دەيىن تۇتىنۋ دەڭگەيى تولىق قامتاماسىز ەتىلۋى ءتيىس. ءبىراق يمپورت كوبىرەك ساقتالىپ وتىرعان باسقا سالالاردا دا وندىرۋشىلەردى ىزدەپ، وسى جوبالارعا كومەك كورسەتۋ قاجەت»، — دەپ اتاپ ءوتتى سەرىك جۇمانعارين.
ايتا كەتسەك، كەيبىر ساراپشىلار بيۋدجەت تاپشىلىعى كەزەڭىندە «بايتەرەك» حولدينگىگە قوماقتى سومانىڭ ءبولىنۋىن اقىلعا قونىمسىز دەپ ايتقان ەدى. ۇكىمەتكە ەكونوميكانى جانە كەيبىر باسىم سالالاردى مەملەكەتتىڭ اقشاسىمەن "ازىقتاندىرۋ" ادەتىن قويۋ كەرەكتىگى تۋرالى ۇسىنىس تا جاسالعان.
