الماتى وبلىسىندا 19 جاستاعى دىنمۇحاممەد شىناربەك اسكەري بولىمنەن سۋيسيد جاساعان كۇيىندە تابىلدى، دەپ حابارلايدى Dalanews.kz.

بۇل تۋرالى ونىڭ اپكەسى ەڭلىك قالتايەۆا حابارلادى.

اپكەسىنىڭ سوزىنشە، 2024 جىلدىڭ كۇزىندە اسكەر قاتارىنا ونىڭ اعاسى دانيال شىناربەك شاقىرىلسا، كوكتەمدە ونىڭ ەگىزى – دىنمۇحاممەد شىناربەك اسكەرگە الىنعان.

«ولار بىرگە قىزمەت ەتىپ ءجۇردى، ءبىراق انت قابىلداعاننان كەيىن دىنمۇحاممەدتى ماتىبۇلاقتاعى №01098 اسكەري بولىمگە اۋىستىرىپ، اعاسىنان اجىراتتى. ەگىزدەردى بولۋگە بولمايدى. ءدال سول جەردە قايعىلى وقيعا بولدى. بۇگىن دىنمۇحاممەد شىناربەكتىڭ اسىلىپ قالعانى تۋرالى حابار بەردى»، – دەدى ول.

29 تامىزدا دىنمۇحاممەد 19 جاسقا تولعان. اپكەسى ونىڭ ەڭبەكقور، مەيىرىمدى، بولاشاعىنا ۇمىتپەن قاراعانىن ەسكە الدى.

«ءبىز قارا جامىلىپ وتىرمىز، ونىڭ ءولىمىن سۋيسيد دەپ تۇسىندىرۋىنە سەنە المايمىز. نەگە بەيبىت ۋاقىتتا وسىنداي جاس جىگىتتەر قازا تابادى؟ بىزگە شىندىق پەن ادىلەت كەرەك»، – دەدى ەڭلىك قالتايەۆا.

قازاقستان قارۋلى كۇشتەرىنىڭ قۇرلىق اسكەرلەرىنىڭ باسپا ءسوز قىزمەتىنىڭ مالىمەتىنشە، 17 قىركۇيەكتە گۆاردەيسك گارنيزونىنداعى اسكەري بولىمدەردىڭ بىرىندە مەرزىمدى اسكەري قىزمەت اتقارىپ جۇرگەن سارباز وز-وزىنە قول جۇمساعان. 

اتالعان فاكت بويىنشا قىلمىستىق ءىس قوزعالىپ، تەرگەۋ امالدارى جۇرگىزىلۋدە.

قۇرلىق اسكەرلەرى باس قولباسشىسىنىڭ تاپسىرماسىمەن وقيعانىڭ ءمان-جايىن انىقتاۋ ءۇشىن ارنايى كوميسسيا جىبەرىلدى. قازاقستان رەسپۋبليكاسى قارۋلى كۇشتەرى قۇرلىق اسكەرلەرىنىڭ قولباسشىلىعى مارقۇمنىڭ تۋىستارى مەن جاقىندارىنا قايعىرىپ كوڭىل ايتىپ، ولارعا بارلىق قاجەتتى كومەك كورسەتىلەتىنىن جەتكىزدى.