ءماجىلىس دەپۋتاتى داۋلەت مۇقايەۆ ءتىس ەمحانالارىندا بولىپ جاتقان كۇماندى ارەكەتتەرگە قاتىستى پىكىر ءبىلدىردى، - دەپ حابارلايدى Dalanews.kz.
ءمان-جايى
بۇعان دەيىن 15 قىركۇيەكتەن باستاپ 2026 جىلعى 15 ساۋىرگە دەيىن enpf-otbasy.kz پلاتفورماسىندا ءتىس ەمدەۋگە ءوتىنىش قابىلداۋ توقتاتىلدى. ارتىنشا قازاقستاندىقتار زەينەتاقى جيناعىن ءتىس ەمدەۋگە مۇلدەم قولدانا المايتىن بولدى. مۇنىڭ ءبارى زەينەتاقى جيناعىن الۋ كەزىندەگى زاڭسىزدىقتارعا بايلانىستى قابىلداندى.
وعان قوسا قارجىلىق مونيتورينگ اگەنتتىگى اتىراۋ وبلىسىندا "ءبىرىڭعاي جيناقتاۋشى زەينەتاقى قورىنان" قاراجاتتى زاڭسىز الۋعا جاردەم كورسەتكەن 5 قىلمىستىق توپتىڭ ارەكەتىن اشكەرەلەدى.
دەپۋتاتتىڭ پىكىرى
ءماجىلىس دالىزىندە دەپۋتات جۋرناليستەردىڭ ساۋالىنا جاۋاپ بەردى.
"ميللياردتاعان اقشا ەلىمىزدەگى توپ-20 ءتىس ەمحاناسىنا عانا تيەسىلى ەكەن. ونىڭ ىشىندە شىنايى ءتىسىن ەمدەتىپ جاتقان ازاماتتار بار. ودان كەيىن وتىرىك ەمدەتىپ جاتقاندار بار. مەن "10-15 پايىزىن الىپ قالادى" دەيتىندى ەستيمىن. سوندىقتان دا وسىنداي ارەكەتتەردەن ونى توقتاتتى"، - دەدى ول.
داۋلەت مۇقايەۆ بۇل قارجى حالىقتىڭ قاجەتىنە جۇمسالۋى كەرەك دەگەن پىكىردە.
"جالپى مەنىڭ تۇسىنىگىمدە شەكتەن اسقاننان كەيىن حالىقتىڭ ءوز اقشاسى عوي. بەرىلۋى كەرەك. ءتىسىن ەمدەي مە، توي جاساي ما، يت الا ما، كرەديتىن جابا ما، ەت الا ما، ول - ءوزىنىڭ جيناقتاعان اقشاسى. وعان "نە ءتىسىڭدى ەمدە، بولماسا ءۇي ال" دەگەن دۇرىس ەمەس سەكىلدى. ويتكەنى ول - ءوزىنىڭ جيناپ، ايلىعىنان ون پايىز بەرىپ وتىرعان اقشاسى. مەن العان جوقپىن، مەن جينايمىن"، - دەدى دەپۋتات.
كەيىنگى كەزدە "دەكرەتكە ميلليونمەن" داۋى توڭىرەگىندە داۋلەت مۇقايەۆقا قاتىستى ءتۇرلى پىكىر ايتىلىپ جاتىر. جۋىردا دەپۋتاتتىڭ ءوزى وسىعان بايلانىستى "قىزمەتتىك تەكسەرىس ءجۇرىپ جاتىر" دەگەن اقپاراتتى جوققا شىعاردى.
