Májilis depýtaty Dáýlet Muqaev tis emhanalarynda bolyp jatqan kúmándi áreketterge qatysty pikir bildirdi, - dep habarlaidy Dalanews.kz.
Mán-jaiy
Buǵan deiin 15 qyrkúiekten bastap 2026 jylǵy 15 sáýirge deiin enpf-otbasy.kz platformasynda tis emdeýge ótinish qabyldaý toqtatyldy. Artynsha qazaqstandyqtar zeinetaqy jinaǵyn tis emdeýge múldem qoldana almaityn boldy. Munyń bári zeinetaqy jinaǵyn alý kezindegi zańsyzdyqtarǵa bailanysty qabyldandy.
Oǵan qosa Qarjylyq monitoring agenttigi Atyraý oblysynda "Biryńǵai jinaqtaýshy zeinetaqy qorynan" qarajatty zańsyz alýǵa járdem kórsetken 5 qylmystyq toptyń áreketin áshkereledi.
Depýtattyń pikiri
Májilis dálizinde depýtat jýrnalisterdiń saýalyna jaýap berdi.
"Milliardtaǵan aqsha elimizdegi TOP-20 tis emhanasyna ǵana tiesili eken. Onyń ishinde shynaiy tisin emdetip jatqan azamattar bar. Odan keiin ótirik emdetip jatqandar bar. Men "10-15 paiyzyn alyp qalady" deitindi estimin. Sondyqtan da osyndai áreketterden ony toqtatty", - dedi ol.
Dáýlet Muqaev bul qarjy halyqtyń qajetine jumsalýy kerek degen pikirde.
"Jalpy meniń túsinigimde shekten asqannan keiin halyqtyń óz aqshasy ǵoi. Berilýi kerek. Tisin emdei me, toi jasai ma, it ala ma, kreditin jaba ma, et ala ma, ol - óziniń jinaqtaǵan aqshasy. Oǵan "ne tisińdi emde, bolmasa úi al" degen durys emes sekildi. Óitkeni ol - óziniń jinap, ailyǵynan on paiyz berip otyrǵan aqshasy. Men alǵan joqpyn, men jinaimyn", - dedi depýtat.
Keiingi kezde "Dekretke millionmen" daýy tóńireginde Dáýlet Muqaevqa qatysty túrli pikir aitylyp jatyr. Jýyrda depýtattyń ózi osyǵan bailanysty "qyzmettik tekseris júrip jatyr" degen aqparatty joqqa shyǵardy.
