رەسەي ۋكرايناعا باسىپ كىرىپ، سوعىس باستالعالى كورشى ەلدىڭ ارتىستەرى ءبىزدىڭ ەلگە «ءۇيىر» بولدى. ولاي دەيتىنىمىز، بۇرىن قازاقستانعا جەكە كونسەرتپەن كوپ كەلمەيتىن رەسەيلىك ارتىستەر ءبىزدىڭ ەلدە كەش ۇيىمداستىرۋدى ادەتكە اينالدىرا باستادى. ءبىراق قازاقستاندىقتار اۋەل باستان ولاردىڭ كونسەرتىن وتكىزبەي تاستادى. دەگەنمەن ءالى كۇنگە دەيىن سوعىستى قولدايتىن Z-ارتىستەر «ءۇمىتسىز شايتان» دەپ ءبىزدىڭ ەلدە كونسەرت وتكىزىپ كورۋگە تالپىنىپ ءجۇر. ءبىراق ولارى دا ناتيجەسىز. Dalanews.kz ءتىلشىسى قازاقستاندا «وتمەنا» بولعان رەسەيلىك ارتىستەردىڭ كونسەرتىنە شولۋ جاسادى.
الەۋمەتتىك جەلىدە ەكى كۇن بۇرىن رەسەيلىك ءارتىس ءتيماتيدىڭ كونسەرتى استاناداعى بارىس ارەنادا جانە الماتىدا وتەتىنى تۋرالى بەلگىلى بولدى. انونس شىققان كۇنى-اق قازاقستاندىقتار Threads جەلىسىندە بەلسەندى بولىپ، ءانشىنىڭ كونسەرتىنە قارسى شىقتى.
ارتىنشا قازاقستاندىقتار ءتيماتيدىڭ كونسەرتى وتپەيتىن بولدى دەپ جارىسا جازا باستادى. الايدا بيلەت ساتاتىن سايتتىڭ وكىلدەرى بۇل اقپاراتتى ءالى راستامادى. ءتىپتى ماتەريال جازىلعان ۋاقىتتا سايتتا بيلەتتەر ءالى قولجەتىمدى.
ءتيماتيدىڭ كونسەرتى وتپەيدى دەپ "وكپەلەگەن" قازاقستاندىقتار دا بار.
ءبىر قىزىعى كونسەرتتى ۇيىمداستىرۋشى الەكسەي پۋچكوۆ قازاقستاندىقتارعا ءتىل تيگىزىپ ۇلگەرگەن.
ايتا كەتەيىك، ءتيماتيدىڭ كونسەرتى قىرعىزستاندا دا وتەدى دەگەن اقپارات تارادى. الايدا بىشكەك تۇرعىندارى دا رەسەيلىك ءارتىستىڭ ەلگە كەلۋىنە قارسى شىعىپ جاتىر.
ەسكە سالايىق، 2022 جىلدىڭ 18 ناۋرىزىندا، رەسەيدىڭ ۋكرايناعا قارسى سوعىسى باستالعاننان كەيىن شامامەن ءبىر اي وتكەن سوڭ، تيماتي ماسكەۋدەگى «لۋجنيكي» سپورت كەشەنىندە قىرىم اننەكسياسىنىڭ جىلدىعىنا ارنالعان ميتينگ-كونسەرتتە ونەر كورسەتتى. شارانىڭ اتاۋى: «Zا ءناسيزمسىز الەم!»، «Zا رەسەيدى!»، «Zا پرەزيدەنتتى!» بولعان ەدى.
فوتو: ماكسيم بلينوۆ/ريا «نوۆوستي»
ايتا كەتەيىك، بۇل رەسەي ارتىستەرىنىڭ قازاقستاندا كونسەرت وتكىزۋىنە العاش رەت تىيىم سالىنۋى ەمەس. بۇعان دەيىن تاعى ءبىر Zء-ارتىس پولينا گاگارينانىڭ كونسەرتى 27 قاراشادا استاناداعى كونگرەسس-ورتالىعىندا وتەدى دەپ جوسپارلانعان. الايدا الەۋمەتتىك جەلىلەردە بۇل شارانى توقتاتۋعا شاقىرعان ۇندەۋلەر بەلسەندى تۇردە تارادى. قارسى تاراپتىڭ نەگىزگى ءۋاجى – ءانشىنىڭ رەسەيدەگى ۇگىت-ناسيحاتتىق اكسيالارعا قاتىسۋى جانە سوعىستىق اگرەسسيانى اشىق قولداۋى.
2023 جىلى الماتىدا ءوتۋى ءتيىس بولعان ونىڭ كونسەرتى دە حالىق نارازىلىعىنان كەيىن وتپەي قالعان ەدى. سول كەزدە بيلەتتەر ساتىلىمنان الىنىپ، افيشالار الىنىپ، ال ۇيىمداستىرۋشىلار تۇسىنىكتەمە بەرۋدەن باس تارتقان بولاتىن.
بيىل ءانشى زەمفيرانىڭ 6 شىلدەدە الماتىداعى كونسەرتى وتپەي قالدى. رەسەيدە «شەتەلدىك اگەنت» دەپ تانىلعان ءانشىنىڭ كونسەرتى قازۇۋ بالانسىنا تيەسىلى «ءحان-تاڭىرى» ستاديونىندا وتەدى دەپ جوسپارلانعان ەدى. ۋنيۆەرسيتەت مۋزىكالىق شارانىڭ نە سەبەپتى توقتاتىلعانىن ءتۇسىندىردى.
