ايگىلى «ۆولونتەر» پەريزات كايرات پەن اناسى عايني الاشبايەۆاعا قاتىستى ءىس بويىنشا سوتتا زارداپ شەككەندەر ءسوز الدى. 47 ادامنان تۇراتىن جابىرلەنۋشىلەر توبى الاياقتىقپەن جىمقىرىلعان قاراجاتتى قايتارۋدى تالاپ ەتىپ وتىر. ايىپتاۋ تاراپىنىڭ دەرەگىنشە، بۇل قارجى قايىرىمدىلىق ماقساتقا – رەابيليتاسيالىق ورتالىق قۇرىلىسىنا، پالەستينا حالقىنا جانە سۋ تاسقىنىنان زارداپ شەككەندەرگە كومەككە جينالعانىمەن، شىن مانىندە، كۇدىكتىلەردىڭ ءسان-سالتاناتقا تولى ومىرىنە جۇمسالعان، دەپ حابارلايدى Dalanews.kz.
سوتتا العاش بولىپ ءسوز العان «سترويكونسترۋكسيا» اق-نىڭ زاڭ كەڭەسشىسى عاليا يسايەۆا كومپانيانىڭ BizBirgemiz Qazaqstan 2030 قورىنا سۋ تاسقىنىنان زارداپ شەككەندەرگە كومەكتەسۋ ءۇشىن 200 مىڭ تەڭگە اۋدارعانىن مالىمدەدى.
«ءقازىر جۇرت بۇل ەكەۋىن «بەلدەمشە كيگەن وستاپ بەندەر» دەپ اتاپ ءجۇر، كەيبىرى اتىشۋلى الاياق سونكا زولوتايا رۋچكامەن سالىستىرادى. ارينە، اركىمنىڭ ءوز پىكىرى بار. دەگەنمەن قىلمىستىق ءىس ماتەريالدارىمەن تانىسىپ، پروكۋروردىڭ ءسوزىن تىڭداعاننان كەيىن پەريزات كايرات پەن اناسى عايني الاشبايەۆانىڭ قىلمىس جاساعانى تولىق دالەلدەندى دەپ سانايمىن. سوندىقتان ولارعا زاڭنىڭ ەڭ قاتال تالابىن قولدانۋدى سۇرايمىن»، – دەدى عاليا يسايەۆا.
ال نازاربايەۆ زياتكەرلىك مەكتەبىنىڭ وكىلى بولسا، پەريزات كايراتتىڭ ارەكەتى قوعامدا ۆولونتەرلەر مەن قايىرىمدىلىق ۇيىمدارىنا دەگەن سەنىمدى كۇيرەتىپ، قازاقستاننىڭ حالىقارالىق بەدەلىنە دە نۇقسان كەلتىرگەنىن اتاپ ءوتتى.
«ولارعا زاڭ بويىنشا قاتاڭ جازا بەرىلۋى كەرەك. مۇندا اڭگىمە تەك الاياقتىق نەمەسە قارجىلىق شىعىن جايلى ەمەس. بۇل جەردە ەلىمىزدىڭ الەمدىك دەڭگەيدەگى بەدەلىنە سوققى جاسالىپ، ازاماتتاردىڭ بىر-بىرىنە دەگەن سەنىمى بۇزىلدى. ۆولونتەرلەرگە دەگەن تەرىس كوزقاراس قالىپتاستى. ءبىز ءۇشىن 901 855 تەڭگە – اسا ۇلكەن سوما بولماۋى مۇمكىن، ءبىراق بۇل – بالالاردىڭ اقشاسى، نزم وقۋشىلارىنىڭ اتا-اناسى جيناعان قاراجات. سوندىقتان بالالار ادىلدىك بار ەكەنىن، جاساعان ءار ءىسىڭ ءۇشىن جاۋاپ بەرۋگە تۋرا كەلەتىنىن ءتۇسىنۋى ءتيىس»، – دەدى مەكتەپ وكىلى.
ىسكە قاتىسى بار تاعى ءبىر ازامات ولجاس سادىق بلوگەر نازيم ميسانوۆپەن بىرگە 83 ملن تەڭگە جيناپ، پەريزاتقا اۋدارعانىن ايتىپ، ونىڭ كىناسى تولىق دالەلدەنگەنىن اتاپ ءوتتى.
«مەنىڭ ازاماتتىق تالاپ-ارىزىمدى قاناعاتتاندىرۋدى سۇرايمىن. پروكۋروردىڭ پەريزاتقا سۇراعان جازاسىن قولدايمىن، ءبىراق عايني الاشبايەۆاعا كەلگەندە ءبىرشاما جەڭىلدىك تانىتۋدى سۇرايمىن. ونىڭ دەنساۋلىعى ناشار ەكەنىن بىلەمىن، سوندىقتان ءۇيقاماقتا ۇستاۋ جەتكىلىكتى دەپ ويلايمىن»، – دەدى ول.
ەسكە سالا كەتسەك، بۇعان دەيىن پروكۋراتۋرا پەريزات كايراتقا 10 جىل باس بوستاندىعىنان ايىرۋ، مۇلكىن تاركىلەپ، 10 جىل بويى قايىرىمدىلىقپەن اينالىسۋعا تىيىم سالۋدى سۇراعان بولاتىن. اناسى عايني الاشبايەۆاعا 8 جىلعا باس بوستاندىعىنان ايىرۋ جازاسى سۇرالدى. ايىپتالۋشىلار ءوز كىنالارىن مويىنداعان جوق. سوت پروسەسى جالعاسىپ جاتىر.
