ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ءماسىموۆ ءىسى بويىنشا تاركىلەنگەن باعالى بۇيىمدار ەلەكتروندى ساۋدا الاڭىندا ساتىلىمعا قويىلدى، دەپ حابارلايدى Dalanews.kz.

اكتيۆتەردى قايتارۋ باسقارماسى ۇيىمداستىرعان ونلاين-اۋكسيوندا كوزدىڭ جاۋىن الاتىن اسىل زاتتار بار: ءىنجۋ-مارجاندى بىلەزىكتەر مەن مونشاقتار، قىمبات بيجۋتەريا، بىلعارى بەلبەۋلەر مەن ەكسكليۋزيۆتى قالامدار، سونداي-اق، كوللەكسيالىق مونەتالار مەن سۋىق قارۋ تۇرلەرى، قىلىشتار، قانجارلار، بالتالار مەن پىشاقتار.

ساۋداعا شىعارىلعان بۇيىمداردىڭ باعاسى دا سان ءتۇرلى.

مىسالى، Montegrappa Italia ماركالى قالامنىڭ باستاپقى قۇنى 628 مىڭ تەڭگە بولسا، مۇيىزدەن جاسالعان سابى بار قىلىش 582 مىڭ تەڭگەدەن ساتىلىپ جاتىر.

كاۆكاز قانجارىنىڭ باعاسى 198 مىڭ، باسى قولتىراۋىن بەينەسىندە جاسالعان داماسك بولاتىنان سوعىلعان پىشاق 95 مىڭ تەڭگەگە باعالانعان.

اۋكسيونداعى ەڭ قىمبات بۇيىم نومينالى 200 دوللارلىق، ەليزاۆەتا II بەينەلەنگەن سۋۆەنيرلىك مونەتا. ونىڭ ساتىلىمداعى قۇنى 3،1 ملن تەڭگە.

بۇل زاتتاردىڭ بارلىعى ءماسىموۆتىڭ ءىسى بويىنشا استاناداعى ۆيللادان تاركىلەنگەن مۇلىك تىزىمىنە ساي كەلەدى. بۇعان دەيىن بۇل جەر تەلىمى كاسىپكەر كەڭەس راقىشيەۆتىڭ جەكە مەنشىگىندە بولعانى ايتىلعان ەدى. 

ەسكە سالايىق، بۇعان دەيىن ءماسىموۆتىڭ استاناداعى ءزاۋلىم ءۇيى ءۇشىنشى رەت ساۋداعا قويىلعان بولاتىن. 

اۋكسيون 13 مامىر كۇنى ءوتۋى كەرەك بولعان. 

قايتارىلعان اكتيۆتەردى باسقارۋ جونىندەگى كومپانيا نۇرا اۋدانى ەرەيمەنتاۋ كوشەسى، 1 مەكەنجايىندا ورنالاسقان ەڭسەلى ءزاۋلىم ءۇيدى ساتۋعا قويىلعان بولاتىن.

باستاپقى باعاسى – 1،8 ملرد تەڭگە، كەپىلدىك جارناسى – 118 ملن تەڭگە.

قىزىعى، ءدال وسى ءۇيدىڭ سۋرەتتەرىن 2022 جىلى ۇلتتىق قاۋىپسىزدىك كوميتەتى ەكس-توراعا كارىم ءماسىموۆ قاماۋعا الىنعان كەزدە جاريالاعان ەدى. تەرگەۋ بارىسىندا ونىڭ زاڭسىز يەمدەنگەن بىرنەشە نىسانى انىقتالعان، سولاردىڭ ءبىرى - ەڭسەلى كوتتەدج.

ءماسىموۆ 2022 جىلعى قاڭتار وقيعاسى كەزىندە ۇستالدى. كەيىن وعان «مەملەكەتكە وپاسىزدىق جاسادى»، «بيلىكتى كۇشپەن باسىپ الۋعا ارەكەتتەندى» دەگەن اۋىر ايىپتار تاعىلىپ، 2023 جىلعى ساۋىردە 18 جىلعا سوتتالدى. ول ۇكىمگە اپپەلياسيالىق شاعىم تۇسىرگەنىمەن، سوت شەشىمدى وزگەرتپەدى. بىلتىر جازدا «راقىمشىلىققا ىلىگەمىن بە» دەگەن ءۇمىتى دە اقتالماي، توقايەۆ «مۇرتتىنىڭ» ءوتىنىشىن ماقۇل كورمەدى.