شقو اكىمى نۇرىمبەت ساقتاعانوۆ قحر ەلىنىڭ ءىرى Funde Holding Group Co.، Ltd. كومپانياسىنىڭ وكىلدەرىمەن كەزدەستى. ينۆەستورلار زايسان اۋدانىندا تابيعي گاز ءوندىرۋ جوباسىن جۇزەگە اسىرۋعا مۇددەلى. بۇل وڭىرگە شامامەن ەكى ميلليارد اقش دوللار ينۆەستيسيا تارتۋعا جانە جاڭادان مىڭنان استام جۇمىس ورنىن اشۋعا مۇمكىندىك بەرەدى،- دەپ حابارلايدى Dalanews.kz
جۇڭگو ەلىنىڭ كومپانياسى حالىقارالىق تاجىريبەگە يە جانە بۇكىل الەم بويىنشا اۋقىمدى ەنەرگەتيكالىق باستامالاردى جۇزەگە اسىرىپ كەلەدى. ينۆەستورلار جوبانى جۇزەگە اسىرماس بۇرىن اۋداننىڭ كليماتتىق، گەوگرافيالىق جانە ينفراقۇرىلىمدىق جاعدايلارىنا تەرەڭ تالداۋ جاساعان. كەزدەسۋ اياسىندا ىنتىماقتاستىقتىڭ الدىن الا جوسپارى، سونداي-اق جوبانى تالقىلاۋعا بەيىندى باسقارمالار مەن ساراپشىلاردىڭ قاتىسۋى كەلىسىلدى.
«جوبانىڭ جۇزەگە اسۋى زايسان اۋدانىنىڭ تۇرعىندارى ءۇشىن ۇلكەن مۇمكىندىك. جاڭا جۇمىس ورىندارى اشىلىپ قانا قويماي، ءوڭىردىڭ تابيعي گاز ءوندىرۋ الەۋەتى كۇشەيەدى. ول ءوز كەزەگىندە ايماق ەكونوميكاسىنىڭ دامۋىنا وڭ اسەر بەرەرى ءسوزسىز»، - دەدى نۇرىمبەت ساقتاعانوۆ.
كەزدەسۋ شىعىس قازاقستاننىڭ تۇراقتى دامۋى باعىتىنداعى ستراتەگيالىق ارىپتەستىكتىڭ تاعى ءبىر ماڭىزدى كەزەڭى بولدى.
