بۇگىن، 2025 جىلى 23 شىلدەدە قور بيرجاسى اشىلعان ساتتە 1 اقش دوللارىنىڭ باعامى 537 تەڭگە بولىپ، ارى قاراي ورنىنان قوزعالمايتىنداي ءتۇر بايقاتقان. سەبەبى نارىقتا كولەمى 10 ملن دوللاردى قۇرايتىن ءىرى وفەرتا (ۇسىنىس) توبە كورسەتتى. ۇلتتىق بانك نەمەسە كۆازيمەملەكەتتىك سەكتور وسىلايشا اقشا باعامى تىزگىنىن تارتىپ جاتقان بولۋى مۇمكىن. دەگەنمەن، باستان وتكەن تاجىريبە كورسەتكەندەي، مۇنداي "قالقان" دا سۇرانىس جوعارى بولعاندا كوپكە شىداس بەرە بەرمەيدى. تۋرا وتكەن اپتاداعىداي. سول جاعداي وسى اپتادا دا قايتالاناتىن سيايقتى. ويتكەنى ءقازىردىڭ وزىندە قارسىلاسۋ دەڭگەيى 537 تەڭگەدەن 540-541 تەڭگەگە قاراي ويىستى. ازىرگە، رەسمي ورگاندار ءۇنسىز. ال بەكتەنوۆ وڭباي سىنعا ۇشىراۋدا. سەبەبى 2026 جىلى يگەرىلەدى دەپ ۇكىمەت باسشىسى ايتقان شەككە اقش دوللارى قاس قىلعاندا بۇگىن الدىن الا جىنىگىپ جەتىپ الدى. نارىق ويىنشىلارى بولسا، بۇل رەتتە نە دەيدى؟ مۇنى Dalanews.kz سايتىنان وقىپ-بىلە وتىرىڭىزدار.
"ءقازىر نارىقتا اگرەسسيۆتى سۇرانىس انىق بايقالادى. ساتىپ الۋشىلار تاراپىنان 534–534،5 تەڭگە دەڭگەيىندە جالپى سوماسى 2،5 ملن دوللار بولاتىن وتىنىمدەر قويىلعان. ۇلتتىق بانك تاراپىنان قانداي دا ءبىر ءىس-قيمىل، قورعانىس ينتەرۆەنسيالارى بايقالمايدى. سوعان قاراعاندا رەتتەۋشى ورگان تەڭگەنىڭ جاڭا تەپە-تەڭدىك دەڭگەيىنە كوشۋىنە قارسى ەمەس دەگەن بولجام جاساۋعا بولادى. نەمەسە نارىقتا وتە ءىرى ويىنشى پايدا بولىپ، ۆاليۋتا ساتىپ الۋدا، ال ونىڭ بۇل ارەكەتى بىرنەشە كۇن نەمەسە اپتاداعى اقشا باعامىنا جاڭاشا سەرپىن بەرۋى مۇمكىن. ال باسەكەلەس دەڭگەي ءقازىر 537-دەن 540–541 تەڭگەگە قاراي ىعىستى. ناقتىراق ايتقاندا، 540 تەڭگەدەن 2،5 ملن دوللار جانە 540،5–541 تەڭگەدەن تاعى 0،6 ملن دوللار كولەمىندە وفەرتالار پايدا بولدى. بۇل باعانىڭ جوعارعى شەگىن تىركەۋ ءۇشىن جاسالىپ جاتقان ارەكەت بولۋى مۇمكىن. ءبىراق ساتىپ الۋشىلار تاراپىنان قىسىم ايتارلىقتاي كۇشەيگەن: 539،5–539،7 ارالىعىندا تاعى 2،3 ملن دوللارلىق ءوتىنىم پايدا بولدى. دەمەك، تەڭگەنىڭ جاڭا باعام دالىزىنە اۋىسۋى ابدەن مۇمكىن"، دەپ جازادى ەكونوميست ەلدار شامسۋتدينوۆ ءوزىنىڭ كومەنتاريي Telegram ارناسىندا.
ونىڭ پىكىرىنشە، نارىق ۇلتتىق بانكتىڭ بەلسەندى ارالاسۋىنسىز سۇرانىس پەن ۇسىنىستىڭ تەڭگەرىمدى جاڭا كولەمىن سىناپ كورۋدە.
ال نارىققا قاتىسۋشىلار اراسىندا ءقازىر بىرنەشە بولجام قىزۋ تالقىلانۋدا:
- بىرىنشىدەن، ۆاليۋتا باعامىنىڭ كۇرت وسىمىنە ءىرى قارجى توپتارىنىڭ ءبىرى، مىسالى Jusan توبىنىڭ ءىرى كولەمدە دوللار ساتىپ الۋى سەبەپ بولۋى ىقتيمال. بۇل جاعداي ۆاليۋتاعا دەگەن سۇرانىستىڭ ماۋسىمدىق كەزەڭدەگى ارتۋىنا سايكەس كەلىپ وتىر.
- ەكىنشىدەن، قارجى مينيسترلىگىنە ەۋرووبليگاسيالاردان تۇسكەن قاراجاتتى كونۆەرتاسيالاۋ الدىندا تەڭگە باعامىن السىرەتىپ الۋ ءتيىمدى بولۋى مۇمكىن دەگەن دە پىكىر بار. بىلتىر قازان ايىندا ءدال وسىعان ۇقساس سەناريي ىسكە اسىپ، تەڭگە باعامى شامامەن 20 تەڭگەگە قۇلدىراعان بولاتىن.
دەگەنمەن بۇل قوس دولبار مەملەكەتتىك ورگانداردىڭ رەسمي ۇستانىمى بولىپ تابىلمايتىنىن باسا ايتا كەتەلىك.
