2025 جىلدىڭ 22 شىلدەسىندە اپەللياسيالىق سوت القاسى اقمارال توكەن مەن ۇلتتىق بانك اراسىنداعى ازاماتتىق داۋدى قارادى. ۇلتتىق بانك ماگيستراتۋرادا وقۋ تۋرالى كەلىسىمشارتتىڭ شارتتارى بۇزىلدى دەپ ەسەپتەپ، جاس ماماننان 17 ملن تەڭگە ءوندىرىپ الۋدى تالاپ ەتىپ وتىر. ال جاۋاپكەر كەلىسىمشارتتى ورىنداۋعا ءوزى نيەتتى بولعانىمەن، بانك مۇمكىندىك بەرمەدى دەيدى. بۇل تۋرالى ول كۋرسيۆ مەديا باسىلىمىنا مالىمدەدى، دەپ حابارلايدى Dalanews.kz.
ۇلتتىق بانكتىڭ ءۋاجى
ءبىرىنشى ينستانسيا سوتى اقمارال توكەننەن 17 ملن تەڭگە كولەمىندە شىعىن ءوندىرۋ تۋرالى شەشىم شىعارعان. تالاپكەر تاراپتىڭ ايتۋىنشا، بانك ماگيستراتۋرا ستۋدەنتتەرىنە وقۋ اقىسىن تولەپ، اي سايىن ستيپەنديا رەتىندە 700 مىڭ تەڭگەدەن استام قاراجات بەرگەن. شارتقا ساي، تۇلەك وقۋىن اياقتاعان سوڭ بانك ۇسىنعان بوس جۇمىس ورنىنا ورنالاسىپ، ءۇش جىل جۇمىس ىستەۋگە مىندەتتى بولعان. ەگەر بۇل تالاپ ورىندالماسا، بانككە جۇمسالعان شىعىندى قايتارۋى ءتيىس.
الايدا اقمارال توكەن بۇل سومامەن كەلىسپەيدى. ونىڭ ايتۋىنشا، ناقتى العان ستيپەندياسى 130 500 تەڭگەنى عانا قۇراعان. ول ۇلتتىق بانكتە 10 اي جۇمىس ىستەگەن، ءبىراق بۇل مەرزىم كەلىسىمشارتتاعى ءۇش جىلدىق مىندەتتەمەنى ورىنداۋ رەتىندە ەسەپتەلمەگەن.
جۇمىس بارىسىنداعى جانجال
اپەللياسيالىق سوت وتىرىسىنا جاۋاپكەر جۇمىس ىستەگەن دەپارتامەنت باسشىسىنىڭ ورىنباسارى قاتىستى. الايدا ول ءبىرىنشى ساتىداعى سوتقا قاتىسپاعان.
"اقمارال توكەنمەن كىسىمەن بىرگە كوپتەگەن ماگيسترانتتى جۇمىسقا الدىق. بارىمەن ءبىر جىلدىق شارتقا قول قويدىق. كەيبىرىمەن ءۇش ايلىق سىناق مەرزىمىن ەنگىزدىك. اقمارال توكەنگە ەشقانداي ءۇش ايلىق مەرزىم قويعان جوقپىز. سەبەبى ول كىسىلەردىڭ بىلىكتىلىگىنە سەندىك. الايدا جۇمىس بارىسىندا كوپتەگەن ماسەلە تۋىندادى. جاۋاپكەر ءبىزدىڭ ۇلتتىق بانكتىڭ كورپوراتيۆتىك مادەنيەتىنىڭ قاعيداتتارىن ۇستانباۋ فاكتىلەرى بار. ونى دالەلدەي الامىز. كۋاگەرلەر بار"، – دەيدى تالاپكەر تارابى.
ايتۋىنشا، جاۋاپكەر جۇمىس ىستەگەن كەزدە ءجيى جانجال شىعارعان.
"بۇل كىسى ءبىزدىڭ ەڭبەك شارتتارىن ورىندامادى، كونفليكتىگە باردى. 29 ناۋرىزدا ارىز ءتۇسىرىپ، ءبىر كۇن ىشىندە بالا قاراۋ بويىنشا ەڭبەك دەمالىسىنا كەتەمىن دەدى. زاڭ بويىنشا ءبىز ونى بەردىك. جۇمىسى بىتكەن جوق، ءوزى اقش-قا بارىپ كەلدى. سول كەزدە بۇل كىسىنىڭ ۇلتتىق بانكتە جۇمىس ىستەۋگە مۇددەلى ەمەس ەكەنىن بايقادىق. سول سەبەپتى زاڭدى قۇقىعىمىزدى پايدالاندىق"، – دەدى ۇلتتىق بانك قىزمەتكەرى.
سودان كەيىن سۋديا 17 ميلليون تەڭگە كولەمىندەگى تالاپ ارىزدان ءبىر جىلدىق ەڭبەك وتىلىنە سايكەس كەلەتىن سومانى شەگەرۋگە بولا ما دەپ سۇرادى. الايدا بانك وكىلى مەكەمە دەكرەتتىك دەمالىستاعى انادان تالاپتى تولىق كولەمدە ءوندىرىپ الۋعا نيەتتى ەكەنىن ايتتى.
اقمارال توكەننىڭ ءۋاجى
ەكى بالانىڭ اناسى اقمارال توكەن 2019 جىلى Maqsut Narikbayev Universityء-دى ءتامامداعان، Duke University (اقش) جانە لەج ۋنيۆەرسيتەتىندە (بەلگيا) ءبىلىم العان. ءقازىر استاناداعى مNU ۋنيۆەرسيتەتىندە اعا وقىتۋشى بولىپ جۇمىس ىستەيدى.
"دەكرەتتىك دەمالىستا وتىرعانىمدا ەڭبەك شارتىنىڭ مەرزىمى اياقتالۋىنا بايلانىستى ونى توقتاتۋ تۋرالى حابارلاما الدىم. سونىمەن قاتار ۇلتتىق بانك وقۋ شىعىنى رەتىندە جۇمساعان 17 144 419 تەڭگەنى وتەۋ تۋرالى تالاپ جولداعان. مەن مىندەتتەمەلەردەن باس تارتقان جوقپىن. كەلىسىمشارت بويىنشا جۇمىس ىستەۋ مىندەتىن ورىنداۋ ءۇشىن ونى ۇزارتۋدى بىرنەشە رەت جەكە جانە e-Otinish ارقىلى جازباشا تۇردە سۇرادىم. الايدا مەن دەكرەتتەن شىققان كۇنى-اق كەلىسىمشارتتى توقتاتتى"، – دەدى اقمارال توكەن KursivMedia تىلشىسىنە بەرگەن سۇحباتىندا.
كەيىنىرەك ۇلتتىق بانك وقۋ شىعىندارىن تولىق كولەمدە وتەۋ تۋرالى تالاپ ارىز بەرگەن.
توكەننىڭ ايتۋىنشا، ءبىرىنشى ساتىداعى سوتتا ۇلتتىق بانك وكىلدەرى ونىڭ بىلىكتىلىگىنە نەمەسە جۇمىسىنىڭ ساپاسىنا ەشقانداي شاعىمدارى جوق ەكەنىن ايتقان.
"ءبىرىنشى ساتىداعى سوت مەنىڭ كەلىسىمشارت تالاپتارىن ورىنداۋعا مۇمكىندىگىم بولماعانىنا قاراماستان، بانكتىڭ تالابىن قاناعاتتاندىردى"، – دەدى اقمارال توكەن.
