اسا اۋىر قىلمىستاردى جاساعانى ءۇشىن كۇدىكتى ازەربايجاننان ەكستراديسيالاندى، دەپ حابارلايدى Dalanews.kz.
قازاقستان رەسپۋبليكاسىنىڭ باس پروكۋراتۋراسى مەن ىشكى ىستەر مينيسترلىگىنىڭ قىزمەتكەرلەرى قازاقستاننىڭ ازەربايجانداعى ەلشىلىگىنىڭ كومەگىمەن اسا اۋىر قىلمىستار، ونىڭ ىشىندە ادام ءولتىرۋ مەن قاراقشىلىق جاساعانى ءۇشىن ىزدەۋدە جۇرگەن قازاقستان ازاماتىن ازەربايجان رەسپۋبليكاسىنان ەكستراديسيالادى.
وتكەن جىلدىڭ قازانىندا كۇدىكتى باسقا اداممەن توپ بولىپ، تانىس كاسىپكەردى كەزدەسۋگە الداپ شىعارىپ، سونىڭ بارىسىندا ونى ەسىنەن تانعانعا دەيىن ۇرىپ-سوعىپ، جالپى قۇنى 40 ملن تەڭگەگە جۋىق مۇلكىن يەمدەنىپ، كەيىن الماتى قالاسىنىڭ سىرتىنا الىپ شىعىپ، ولتىرگەن.
كۇدىكتىلەردىڭ ءبىرى ءىزىن سۋىتپاي ۇستالىپ، ال ەكىنشىسى جاسىرىنىپ، وعان حالىقارالىق ىزدەۋ جاريالاندى.
اعىمداعى جىلدىڭ قاڭتارىندا ول ازەربايجان اۋماعىندا ۇستالىپ، قازاقستان باس پروكۋراتۋراسىنىڭ سۇراۋى بويىنشا وتانىنا ەكستراديسيالاندى. قازىرگى ۋاقىتتا ول تەرگەۋ يزولياتورىنا قامالدى.
ايىپتالعان قىلمىستاردى جاساعانى ءۇشىن مۇلكىن تاركىلەپ، 20 جىلعا دەيىنگى مەرزىمگە باس بوستاندىعىنان ايىرۋ نەمەسە ءومىر بويىنا باس بوستاندىعىنان ايىرۋ تۇرىندەگى جازالار كوزدەلگەن.
ەسكە سالايىق، بىلتىر قازاندا الماتى وبلىسىندا Lenovo كومپانياسىنىڭ GR ديرەكتورى ەرمەك جاقىپجانوۆتىڭ دەنەسى تابىلعان ەدى.
9 قازاندا ەرمەك جاقىپجانوۆ الماتى قالاسىنداعى ۇيىنەن ءوزىنىڭ قاراسۇر ءتۇستى Hyundai Genesis كولىگىمەن شىعىپ كەتىپ، قايتا ورالماعان.
جاقىپجانوۆ Lenovo كومپانياسىندا 1،5 جىل بويى GR ديرەكتورى (مەملەكەتتىك مەكەمەلەرمەن بايلانىس جونىندەگى مامان) قىزمەتىن اتقارعان.
