ىلە اۋداندىق سوتىندا قارالىپ جاتقان اتىشۋلى ىسكە قاتىسۋشىلار سۋديا ارەكەتتەرىنە نارازىلىق ءبىلدىردى. سوتتا ادۆوكاتتار مەن جابىرلەنۋشى تاراپ سۇراق قويۋ قۇقىعى شەكتەلگەنىن ايتىپ وتىر، دەپ حابارلايدى Dalanews.kz.
بۇل تۋرالى ادۆوكات ساۋلە قوبجانوۆا حابارلادى.
25 جىلدىق تاجىريبەسى بار ادۆوكات العاش رەت – ءارى ءبىر ەمەس، ەكى مارتە – سۋدياعا قارسى وتۆود (قارسىلىق) بىلدىرۋگە ءماجبۇر بولدى. بۇل – ىلە اۋداندىق سوتىندا قارالىپ جاتقان ءىس كەزىندە ورىن الدى. جابىرلەنۋشى تاراپ – كولىك قاعىپ ولتىرگەن ازاماتتىڭ تۋعان اپكەسى – سوت ارەكەتتەرىن "باۋىرىنىڭ رۋحىن قورلاۋ" دەپ باعالادى.
ماسەلە – تانىمال بلوگەر بەيبىت الىبەكوۆتىڭ اتىمەن بايلانىستى ىسكە قاتىستى. Lamborghini كولىگىمەن ادام قاعىپ ءولتىردى دەپ ايىپتالعان ءىس بويىنشا باستى كۋاگەر رەتىندە الىبەكوۆتىڭ جاۋاپ بەرۋى ءتيىس بولاتىن. الايدا ول سوتقا ونلاين قوسىلىپ، جاۋاپ بەردى. بۇل شەشىم ادۆوكاتتار مەن جابىرلەنۋشىلەردىڭ نارازىلىعىن تۋعىزدى.
سوت كۋاگەر بەيبىت الىبەكوۆتىڭ ادۆوكاتى تۇسىرگەن ونلاين جاۋاپ الۋ تۋرالى ءوتىنىشتى قابىلداپ، ونى قاناعاتتاندىردى. بۇعان دەيىن سوت بۇل ءىستى تەك وفلاين فورماتتا قاراۋ كەرەك دەگەن قاۋلى شىعارعان بولاتىن. ادۆوكاتتار بۇل شەشىمگە نارازى بولدى. ولاردىڭ ايتۋىنشا، كۋاگەر سوتقا ەكى اپتا بۇرىن شاقىرىلعانىن ءبىلىپ، ءوز جوسپارىن الدىن الا وزگەرتە الاتىن ەدى.
سوعان قاراماستان، سوت كۋاگەردىڭ استانادا ەكەنىن ايتىپ، ونلاين جاۋاپ بەرۋگە مۇمكىندىك بەردى. الايدا سۇراق قويۋ كەزىندە الىبەكوۆتىڭ قاراعاندىدا ەكەنى انىقتالدى – ول ءدال سول كۇنى ۇشىپ بارعان. ادۆوكات سۇراق قويۋدى جالعاستىرماق بولعاندا، سۋديا ايقايلاپ، تەلەفوندى الىپ قويۋدى تالاپ ەتكەن.
جابىرلەنۋشى تاراپتىڭ ادۆوكاتى گاۋحار سالىمبايەۆا سۇراقتارىن قويعان كەزدە دە سوت ونى ءبولىپ، داۋىس كوتەرىپ، كەيىن مۇلدە سۇراق قويۋعا مۇمكىندىك بەرمەگەن. بۇل ارەكەتتەرگە قارسى ەكىنشى ادۆوكات تا نارازىلىعىن بىلدىرمەك بولعاندا، سۋديا ەكەۋىنە دە ايقايلاپ، ولارعا قارسىلىق بىلدىرۋگە قۇقىقتارى جوق ەكەنىن مالىمدەگەن.
ادۆوكاتتار مۇنداي مالىمدەمە ق ر قىلمىستىق-پروسەسسۋالدىق كودەكسىنىڭ 334-بابى 2-بولىگىنە قايشى ەكەنىن اتاپ ءوتتى. سوت وتىرىسىنداعى بەيتاراپتىق پەن ادىلدىككە كۇمان كەلتىرگەن بۇل ارەكەتتەردەن كەيىن مارقۇمنىڭ اپكەسى دە، اناسى دا سوت زالىنان كەتىپ قالعان.
ادۆوكاتتىڭ ايتۋىنشا، سوت بارىسىندا سۋديا كۋاگەردىڭ ورنىنا ءوزى جاۋاپ بەرۋگە تىرىسقان.
"مەن كۋاگەردىڭ وزىنەن جاۋاپ ەستىگىم كەلەتىنىن ايتتىم. ال سۋدىڭ ورنىنا جاۋاپ بەرۋ – بۇل ادىلدىككە مۇلدەم جات قىلىق"، – دەيدى ول.
سەنىم جوعالدى
"ەگەر ادۆوكاتتارعا سۇراق قويۋعا مۇمكىندىك بەرىلمەسە، ولاردى قورلاپ، ولاردىڭ قارسىلىعىن قابىلداماسا، سوت پروسەسىنىڭ فورماتى تانىمال بلوگەرلەردىڭ ىڭعايىنا قاراي وزگەرسە، وندا مۇنداي پروسەستەن ادىلەت كۇتۋگە بولمايدى"، – دەيدى جابىرلەنۋشى تاراپ.
بۇل جاعدايعا قاتىستى بەلگىلى جۋرناليست گۇلبانۋ ابەنوۆا پىكىر ءبىلدىردى.
"ول بلوگەرلىكتەن تاپقان ميللياردتاعان تابىسىنان سالىق تولەمەيدى. وعان بولادى. ول سوتقا كەلمەي، ءدال سول كۇنى قاراعاندىعا ۇشىپ كەتە الادى. وعان بولادى.. سوت پروسەسى تەك وفلاين ءوتۋى ءتيىس. ءبىراق الىبەكوۆكە ونلاين بولادى. وعان ءتىپتى ادۆوكاتتاردىڭ سۇراقتارىنا جاۋاپ بەرمەۋگە دە – سەبەبى سوت ادۆوكاتتارعا ايقايلاپ، سۇراق قويۋعا مۇمكىندىك بەرمەيدى مە؟ سوت ميللياردەر الىبەكوۆتىڭ قالاۋىن ورىندايتىن داياشى سياقتى ما؟ الدە ول سوتقا اقشا تولەپ قويعان با؟
سوندا قالاي، ەليتالى كولىك استىندا قازا تاپقان جىگىتتىڭ ولىمىنە قاراماستان، بۇل ادامعا وسىنداي جاعداي نە ءۇشىن جاسالىپ وتىر؟ بالكىم، سوت سوڭىندا مارقۇمنىڭ تۋىستارى الىبەكوۆكە كولىكتىڭ جالداۋ اقىسىن دا تولەۋى ءتيىس بولار؟ "، - دەيدى جۋرناليست.
ەسكە سالايىق، قايعىلى وقيعا 2024 جىلى قازاندا بولعان ەدى. الماتى وبلىسىندا Lamborghini Aventador كولىگىنەن سەكىرمەك بولىپ قازا تاپقان باتىرحان ەرجاننىڭ ولىمىنە قاتىستى قىلمىستىق ءىس قوزعالدى. رولدە 45 جاستاعى ەر ادام وتىرعان.
اۋىر جاراقاتتان جىگىت اۋرۋحانادا قازا تاپقان. تەلەارنا مالىمەتىنشە، مارقۇم باتىرحان ەرجان تيكتوك جەلىسىنە العاشقى ۆيدەولارىن وسىدان ەكى جىل بۇرىن سالا باستاپتى. ءوزى تاپ بولعان ءتۇرلى جاعدايدى ازىلمەن جەتكىزىپ، كەيبىر ۆيدەوسى سەگىز ميلليون رەت قارالعان. ءبىراق بۇعان دەيىن جىگىتتىڭ ەكسترەمال كونتەنت تۇسىرگەنى بايقالماعان.
ءقازىر قايعىلى وقيعا بويىنشا پوليسەيلەر تەرگەۋ جۇرگىزدى.
"29 قازاندا اقساي اۋىلىنداعى سوكول اۆتودرومى اۋماعىندا بەينەروليك ءتۇسىرۋ ءۇشىن تريۋك ورىنداۋ كەزىندە 22 جاستاعى جاس جىگىت ابايسىزدا 45 جاستعى جۇرگىزۋشى باسقارعان كولىكتىڭ استىنا ءتۇستى. جىگىت اۋداندىق اۋرۋحاناعا جاتقىزىلدى. ال 30 قازاندا ەسىن جيماستان كوز جۇمدى. اتالعان دەرەك بويىنشا پوليسيا قىلمىستىق ءىس قوزعادى. تەرگەۋ جۇرگىزىلىپ جاتىر"، - دەدى مەرۋەرت مورياكوۆا، الماتى وبلىسى پد رەسمي وكىلى.
وقيعا سەنات دەپۋتاتتارىنا دا ءمالىم بولدى. كولىكتىڭ يەسى عانا ەمەس، تريۋك جاساعان ادام دا ونىڭ سالدارى جايلى الدىن الا ويلاۋ كەرەك ەدى دەپ سانايدى.
"كاسكادەر دۇنيەسى ادام ومىرىنە ءقاۋىپتى. سوندىقتان دا، رولگە وتىرعاننان كەيىن ۇشاق، تىكۇشاق، ماشينا بولسىن، ءبىرىنشى كەزەكتە ءوز ومىرىنە ءوزى جاۋاپتى. كولىكتى جۇرەر الدىندا تەحنيكالىق قاۋىپسىزدىگىن قاراپ شىقتى ما، تەكسەرىپ شىقتى ما دەگەن سياقتى. مەنىڭ ويىمشا، ءبىر جاقتان عانا كىنانى ىزدەۋگە بولمايدى. ول دۇرىس ەمەس. جان-جاقتى قاراۋ كەرەك"، - دەدى گەنناديي شيپوۆسكيح، سەنات دەپۋتاتى.
قايعىلى وقيعا بولعان جەر - «سوكول» اۆتودرومى. الماتىدان الشاق ورنالاسقان بۇل جەردە كولىكسۇيەر قاۋىم جاتتىعۋلار وتكىزىپ، سپورت جارىستارىنا قاتىسادى. اۆتودروم باسشىلىعى بولعان جايتقا پىكىر بىلدىرۋگە قۇلىق تانىتپاعان.
