ءماجىلىس دەپۋتاتى جۇلدىز سۇلەيمەنوۆا ەدەن جۋۋشى، سانتەحنيك، اۋلا تازالاۋشى، ەلەكتريك، پلوتنيك سەكىلدى جۇمىسشىلاردىڭ مۇددەسىن قورعايتىن دەپۋتاتتىق ساۋالدارىنا ۇكىمەت ناقتى شەشىمدەر قابىلداماعانىن ايتتى، دەپ حابارلايدى Dalanews.kz.
دەپۋتاتتىڭ ساۋالى پرەمەر-مينيستردىڭ ورىنباسارى ەرمەك كوشەربايەۆقا باعىتتالدى. جۇلدىز سۇلەيمەنوۆانىڭ سوزىنشە، دەپۋتاتتار ءاردايىم قاراپايىم ەڭبەك ادامدارىنىڭ مۇددەسىن قورعاپ، ولاردىڭ ءومىر ساپاسىن جاقسارتۋعا ەرەكشە كوڭىل ءبولىپ كەلەدى.
"ءماجىلىستىڭ ءۇشىنشى سەسسياسىندا بيۋدجەتتىك ۇيىمداردا ەڭبەك ەتەتىن تەحنيكالىق قىزمەتكەرلەر – ەدەن جۋۋشى، سانتەحنيك، اۋلا تازالاۋشى، ەلەكتريك، پلوتنيك سەكىلدى جۇمىسشىلاردىڭ مۇددەسىن قورعايتىن 7 دەپۋتاتتىق ساۋال جولداندى. بۇل – وڭىرلەردەگى ەڭبەك ۇجىمدارىمەن كەزدەسۋ كەزىندە ازاماتتار كوتەرگەن ناقتى سۇراقتار.
مەملەكەت باسشىسى قاسىم-جومارت كەمەل ۇلى توقايەۆتىڭ 2025 جىلدى "جۇمىسشى ماماندىقتار جىلى" دەپ جاريالاۋى – ەلىمىزدىڭ الەۋمەتتىك-ەكونوميكالىق دامۋىنا سەرپىن بەرەتىن ماڭىزدى قادام. بۇل باستاما جۇمىسشى ماماندىقتارىنىڭ مارتەبەسىن ارتتىرۋ، تەحنيكالىق جانە كاسىپتىك ءبىلىم بەرۋ جۇيەسىن جەتىلدىرۋ ارقىلى ەڭبەك نارىعىنداعى قۇرىلىمدىق تەڭگەرىمسىزدىكتى شەشۋگە ارنالعان"، - دەدى ول.
دەگەنمەن دەپۋتات جەتى ساۋال دا جاۋاپسىز قالعانىنا قىنجىلدى.
"2025 جىلدىڭ 5 ناۋرىزداعى ۇكىمەتتەن كەلىپ تۇسكەن رەسمي جاۋاپتا ءبىزدىڭ ۇسىنىستارىمىزعا بايلانىستى ناقتى شەشىمدەر قابىلدانباعان. مىسالى، ەڭبەك دەمالىسىنا ساۋىقتىرۋ جاردەماقىسىن تەحنيكالىق قىزمەتكەرلەرگە دە قاراستىرۋ، وڭىرلەر اراسىنداعى تەڭسىزدىكتى جويۋ ماقساتىندا الەۋمەتتىك كەپىلدىكتەردىڭ ءبىرىڭعاي مەحانيزمىن بەكىتۋ تۋرالى ۇسىنىس ەسكەرۋسىز قالدى. ەڭبەك جانە حالىقتى الەۋمەتتىك قورعاۋ مينيسترلىگى بۇل ماقساتقا 28،7 ملرد تەڭگە قاجەت ەكەنىن ەسەپتەسە دە، ناقتى شەشىمدەر قابىلدانباعان"، - دەپ سىنادى ول.
دەپۋتاتتىڭ ايتۋىنشا، ۇكىمەت قاۋلىسىنا سايكەس، جەرگىلىكتى اتقارۋشى ورگاندار ازاماتتىق قىزمەتشىلەرگە قوسىمشا ۇستەمەاقى بەلگىلەۋگە قۇقىلى.
"بۇل جۇيەنىڭ ورتالىقتاندىرىلماعانى سەبەپتى وڭىرلەردە ۇلكەن ايىرماشىلىقتار تۋىنداۋدا: كەيبىر وبلىستاردا جالاقى وسسە، قارجى تاپشىلىعىنا بايلانىستى كەيبىر وڭىرلەردە جاعداي وزگەرىسسىز قالۋدا. سونىمەن بىرگە، حلور قولداناتىن جۇمىسشىلارعا وتەماقى تولەۋ جونىندەگى ۇسىنىسىمىزعا كەلىپ تۇسكەن جاۋاپ مۇلدەم قيسىنسىز: "جۇمىس بەرۋشىگە جۇگىنسىن" دەپ ايتىلعان"، - دەپ اشىندى سۇلەيمەنوۆا.
قازاقستان رەسپۋبليكاسى پارلامەنت ءماجىلىسىنىڭ دەپۋتاتى، الەۋمەتتىك-مادەني دامۋ كوميتەتىنىڭ مۇشەسى جۇلدىز سۇلەيمەنوۆا بۇل جولى تاعى دا ۇسىنىستار جولداعان:
- تەحنيكالىق قىزمەتكەرلەردىڭ جالاقىسىن ارتتىرۋعا ارنالعان ءبىرىڭعاي ادىستەمە ازىرلەۋ قاجەت. بۇل ادىستەمەدە ەڭبەك ءوتىلى، جۇكتەمە كولەمى، جۇمىس كۇردەلىلىگى مەن وڭىرلىك ەرەكشەلىكتەر ەسكەرىلۋگە ءتيىس. بارلىق تەحنيكالىق قىزمەتكەرگە، بىلىكتىلىك دارەجەسىنە قاراماستان، ساۋىقتىرۋ جاردەماقىسىن تولەۋدى ورتالىقتاندىرىلعان تۇردە، رەسپۋبليكالىق نەمەسە جەرگىلىكتى بيۋدجەت ەسەبىنەن، ءبىراق ءبىرىڭعاي ادىسپەن قامتاماسىز ەتۋ جانە ونى №1193 قاۋلىدا ناقتى بەكىتۋ ۇسىنىلادى.
- تەحنيكالىق قىزمەتكەرلەردى اعىمداعى جوندەۋ جۇمىستارىنا زاڭسىز تارتۋ توقتاتىلسىن. مۇنداي جاعدايلار بولسا، ەڭبەك شارتتارىنداعى مىندەتتەمەلەردىڭ ورىندالۋىن باقىلاۋ تەتىگىن كۇشەيتۋ قاجەت.
- حلور جانە باسقا دا زيان زاتتارمەن جۇمىس ىستەيتىن تەحنيكالىق قىزمەتكەرلەرگە قوسىمشا وتەماقى قاراستىرۋ جانە ولاردىڭ ەڭبەك جاعدايىن جاقسارتۋ تەتىگىن ازىرلەۋ قاجەت.
ايتا كەتەيىك، دەپۋتات جۇلدىز سۇلەيمەنوۆا ءماجىلىس مىنبەرىندە ەڭبەك ادامدارىنىڭ مۇددەسىن قورعاپ، كوزگە ءتۇسىپ ءجۇر. بۇعان دەيىن كىتاپحاناشىلارعا قاتىستى جاعدايدى دا جەتكىزىپ، ۇسىنىستار جولداعان ەدى.
