Májilis depýtaty Juldyz Súleimenova eden jýýshy, santehnik, aýla tazalaýshy, elektrik, plotnik sekildi jumysshylardyń múddesin qorǵaityn depýtattyq saýaldaryna Úkimet naqty sheshimder qabyldamaǵanyn aitty, dep habarlaidy Dalanews.kz.
Depýtattyń saýaly premer-ministrdiń orynbasary Ermek Kósherbaevqa baǵyttaldy. Juldyz Súleimenovanyń sózinshe, depýtattar árdaiym qarapaiym eńbek adamdarynyń múddesin qorǵap, olardyń ómir sapasyn jaqsartýǵa erekshe kóńil bólip keledi.
"Májilistiń úshinshi sessiiasynda biýdjettik uiymdarda eńbek etetin tehnikalyq qyzmetkerler – eden jýýshy, santehnik, aýla tazalaýshy, elektrik, plotnik sekildi jumysshylardyń múddesin qorǵaityn 7 depýtattyq saýal joldandy. Bul – óńirlerdegi eńbek ujymdarymen kezdesý kezinde azamattar kótergen naqty suraqtar.
Memleket basshysy Qasym-Jomart Kemeluly Toqaevtyń 2025 jyldy "Jumysshy mamandyqtar jyly" dep jariialaýy – elimizdiń áleýmettik-ekonomikalyq damýyna serpin beretin mańyzdy qadam. Bul bastama jumysshy mamandyqtarynyń mártebesin arttyrý, tehnikalyq jáne kásiptik bilim berý júiesin jetildirý arqyly eńbek naryǵyndaǵy qurylymdyq teńgerimsizdikti sheshýge arnalǵan", - dedi ol.
Degenmen depýtat jeti saýal da jaýapsyz qalǵanyna qynjyldy.
"2025 jyldyń 5 naýryzdaǵy Úkimetten kelip túsken resmi jaýapta bizdiń usynystarymyzǵa bailanysty naqty sheshimder qabyldanbaǵan. Mysaly, eńbek demalysyna saýyqtyrý járdemaqysyn tehnikalyq qyzmetkerlerge de qarastyrý, óńirler arasyndaǵy teńsizdikti joiý maqsatynda áleýmettik kepildikterdiń biryńǵai mehanizmin bekitý týraly usynys eskerýsiz qaldy. Eńbek jáne halyqty áleýmettik qorǵaý ministrligi bul maqsatqa 28,7 mlrd teńge qajet ekenin eseptese de, naqty sheshimder qabyldanbaǵan", - dep synady ol.
Depýtattyń aitýynsha, Úkimet qaýlysyna sáikes, jergilikti atqarýshy organdar azamattyq qyzmetshilerge qosymsha ústemeaqy belgileýge quqyly.
"Bul júieniń ortalyqtandyrylmaǵany sebepti óńirlerde úlken aiyrmashylyqtar týyndaýda: keibir oblystarda jalaqy ósse, qarjy tapshylyǵyna bailanysty keibir óńirlerde jaǵdai ózgerissiz qalýda. Sonymen birge, hlor qoldanatyn jumysshylarǵa ótemaqy tóleý jónindegi usynysymyzǵa kelip túsken jaýap múldem qisynsyz: "jumys berýshige júginsin" dep aitylǵan", - dep ashyndy Súleimenova.
Qazaqstan Respýblikasy Parlament Májilisiniń depýtaty, Áleýmettik-mádeni damý komitetiniń múshesi Juldyz Súleimenova bul joly taǵy da usynystar joldaǵan:
- Tehnikalyq qyzmetkerlerdiń jalaqysyn arttyrýǵa arnalǵan biryńǵai ádisteme ázirleý qajet. Bul ádistemede eńbek ótili, júkteme kólemi, jumys kúrdeliligi men óńirlik erekshelikter eskerilýge tiis. Barlyq tehnikalyq qyzmetkerge, biliktilik dárejesine qaramastan, saýyqtyrý járdemaqysyn tóleýdi ortalyqtandyrylǵan túrde, respýblikalyq nemese jergilikti biýdjet esebinen, biraq biryńǵai ádispen qamtamasyz etý jáne ony №1193 qaýlyda naqty bekitý usynylady.
- Tehnikalyq qyzmetkerlerdi aǵymdaǵy jóndeý jumystaryna zańsyz tartý toqtatylsyn. Mundai jaǵdailar bolsa, eńbek sharttaryndaǵy mindettemelerdiń oryndalýyn baqylaý tetigin kúsheitý qajet.
- Hlor jáne basqa da ziian zattarmen jumys isteitin tehnikalyq qyzmetkerlerge qosymsha ótemaqy qarastyrý jáne olardyń eńbek jaǵdaiyn jaqsartý tetigin ázirleý qajet.
Aita keteiik, depýtat Juldyz Súleimenova Májilis minberinde eńbek adamdarynyń múddesin qorǵap, kózge túsip júr. Buǵan deiin kitaphanashylarǵa qatysty jaǵdaidy da jetkizip, usynystar joldaǵan edi.
