الماتى قالاسىنداعى "براتسكيي شاشلىك" كافەسىندە بولعان وقيعا الەۋمەتتىك جەلى قولدانۋشىلارىنىڭ نارازىلىعىن تۋدىردى. وعان سەبەپ – تۇتىنۋشىنىڭ قازاق تىلىندەگى ءمازىردى تالاپ ەتكەنى ءۇشىن مەكەمە تاراپىنان قورلاۋ سيپاتىنداعى جاۋاپ العانى، دەپ حابارلايدى Dalanews.kz.
وقيعا 14 مامىر كۇنى بولعان. قالا تۇرعىنى دوسعالي ءامىروۆ اتالمىش كافەدە تاماقتانىپ، ءمازىردىڭ قازاق تىلىندە ۇسىنىلماعانىن ايتىپ، 2GIS قوسىمشاسىندا پىكىر قالدىرعان. الايدا مەكەمە وكىلى وعان دورەكى تۇردە جاۋاپ بەرگەن.
پىكىردە: "سەن ءبارىن ءتۇسىنىپ تۇرسىڭ عوي، نەگە اقىماق كەيپىن تانىتىپ تۇرسىڭ؟ ناسيست، فاشيست. ەگەر پىكىردى وشىرمەسەڭدەر، قوناقتاردى كۇتىڭدەر!" – دەگەن سوزدەر جازىلعان.
وسىدان كەيىن كافە جاۋابىن ءوشىرىپ، تۇتىنۋشىنى بۇعاتتاپ تاستاعان.
كەيىننەن تاعى ءبىر پىكىردە: "سالەمەتسىز بە، ءبىز ءسىزدىڭ تىلىڭىزدە جاۋاپ بەرۋگە مىندەتتىمىز بە، الدە مەملەكەتىمىزدە ونداي زاڭ بار ما؟" – دەپ جازعان. بۇل جايتقا بايلانىستى تۇتىنۋشى قۇقىق قورعاۋ ورگاندارىنا جۇگىنۋدى جوسپارلاپ وتىر.
وسى جاعدايدان كەيىن جەلى قولدانۋشىلارى ءدامحاناعا بويكوت جاريالاپ، مەملەكەتتىك تىلدە قىزمەت كورسەتۋ – زاڭمەن كەپىلدەندىرىلگەن قۇقىق ەكەنىن ەسكە سالدى. ولاردىڭ ايتۋىنشا، مۇنداي ارەكەت تۇتىنۋشى قۇقىعىن بۇزادى جانە ءتىلدى كەمسىتۋگە جول بەرەدى.
ماسەلەنىڭ ۋشىعۋىنا 2GIS قوسىمشاسىنىڭ مودەراسيا ساياساتى دا اسەر ەتكەن. جەلى قولدانۋشىلارىنىڭ ءبىرى قازاق تىلىندە جازىلعان پىكىرلەر ءجيى مودەراسيادان وتپەيتىنىن، سونداي-اق قوسىمشا ارقىلى پايدالانۋشىلاردىڭ قانداي مەيرامحاناعا بارعانى جونىندەگى مالىمەت سالىق ورگاندارىنا بەرىلۋى مۇمكىن ەكەنىن ايتقان. وسىعان بايلانىستى ول 2GISء-تى پايدالانباۋعا كەڭەس بەردى.
سونىمەن قاتار، كافە وزدەرىنىڭ TikTok پاراقشاسىندا مەملەكەت باسشىسى قاسىم-جومارت توقايەۆتىڭ قوس تىلدىلىككە قاتىستى مالىمدەمەسىن جاريالاعان. الايدا كوپ ۇزاماي بۇل ۆيدەونى ءوشىرىپ تاستاعان. ەسكە سالساق، 24 ساۋىردە قازاقستان حالقى اسسامبلەياسىنىڭ ءحححىV سەسسياسىندا سويلەگەن سوزىندە پرەزيدەنت ءتىل ماسەلەسىن ساياسي قۇرالعا اينالدىرۋعا بولمايتىنىن، مۇنداي ارەكەتتەر زاڭمەن جازالاناتىنىن ەسكەرتكەن ەدى. سونداي-اق، مەملەكەت باسشىسى تۇلەكتەردىڭ 80 پايىزى ۇبت-نى قازاق تىلىندە تاپسىراتىنىن، ال مەكتەپكە العاش باراتىن بالالاردىڭ 70 پايىزدان استامى قازاق تىلىندە ءبىلىم الىپ جاتقانىن ايتقان. سونىمەن قاتار ەشكىمدى قانداي دا ءبىر تىلدە سويلەۋگە ماجبۇرلەۋگە بولمايتىنىن دا اتاپ وتكەن.
