Almaty qalasyndaǵy "Bratskii shashlyk" kafesinde bolǵan oqiǵa áleýmettik jeli qoldanýshylarynyń narazylyǵyn týdyrdy. Oǵan sebep – tutynýshynyń qazaq tilindegi mázirdi talap etkeni úshin mekeme tarapynan qorlaý sipatyndaǵy jaýap alǵany, dep habarlaidy Dalanews.kz.
Oqiǵa 14 mamyr kúni bolǵan. Qala turǵyny Dosǵali Ámirov atalmysh kafede tamaqtanyp, mázirdiń qazaq tilinde usynylmaǵanyn aityp, 2GIS qosymshasynda pikir qaldyrǵan. Alaida mekeme ókili oǵan dóreki túrde jaýap bergen.
Pikirde: "Sen bárin túsinip tursyń ǵoi, nege aqymaq keipin tanytyp tursyń? Natsist, fashist. Eger pikirdi óshirmeseńder, qonaqtardy kútińder!" – degen sózder jazylǵan.
Osydan keiin kafe jaýabyn óshirip, tutynýshyny buǵattap tastaǵan.
Keiinnen taǵy bir pikirde: "Sálemetsiz be, biz sizdiń tilińizde jaýap berýge mindettimiz be, álde memleketimizde ondai zań bar ma?" – dep jazǵan. Bul jaitqa bailanysty tutynýshy quqyq qorǵaý organdaryna júginýdi josparlap otyr.
Osy jaǵdaidan keiin jeli qoldanýshylary dámhanaǵa boikot jariialap, memlekettik tilde qyzmet kórsetý – zańmen kepildendirilgen quqyq ekenin eske saldy. Olardyń aitýynsha, mundai áreket tutynýshy quqyǵyn buzady jáne tildi kemsitýge jol beredi.
Máseleniń ýshyǵýyna 2GIS qosymshasynyń moderatsiia saiasaty da áser etken. Jeli qoldanýshylarynyń biri qazaq tilinde jazylǵan pikirler jii moderatsiiadan ótpeitinin, sondai-aq qosymsha arqyly paidalanýshylardyń qandai meiramhanaǵa barǵany jónindegi málimet salyq organdaryna berilýi múmkin ekenin aitqan. Osyǵan bailanysty ol 2GIS-ti paidalanbaýǵa keńes berdi.
Sonymen qatar, kafe ózderiniń TikTok paraqshasynda memleket basshysy Qasym-Jomart Toqaevtyń qos tildilikke qatysty málimdemesin jariialaǵan. Alaida kóp uzamai bul videony óshirip tastaǵan. Eske salsaq, 24 sáýirde Qazaqstan halqy Assambleiasynyń HHHIV sessiiasynda sóilegen sózinde prezident til máselesin saiasi quralǵa ainaldyrýǵa bolmaitynyn, mundai áreketter zańmen jazalanatynyn eskertken edi. Sondai-aq, memleket basshysy túlekterdiń 80 paiyzy UBT-ny qazaq tilinde tapsyratynyn, al mektepke alǵash baratyn balalardyń 70 paiyzdan astamy qazaq tilinde bilim alyp jatqanyn aitqan. Sonymen qatar eshkimdi qandai da bir tilde sóileýge májbúrleýge bolmaitynyn da atap ótken.
