ا.س. پۋشكين اتىنداعى شىعىس قازاقستان وبلىستىق كىتاپحاناسىندا قازاق ادەبيەتىن وقىتۋدا وزىندىك مەكتەپ قالىپتاستىرعان دارا پەداگوگ، ق ر ەڭبەك سىڭىرگەن قايراتكەرى، ۇلت ۇستازى قانيپا ومارعالي قىزى بىتىبايەۆانىڭ 80 جىلدىعىنا ارنالعان «اڭىزعا اينالعان ۇستاز» اتتى ەسكە الۋ كەشى ءوتتى، دەپ حابارلايدى Dalanews.kz
شاراعا زيالى قاۋىم وكىلدەرى، ارداگەر ۇستازدىڭ شاكىرتتەرى مەن تۋعان-تۋىستارى، مەكتەپ وقۋشىلارى، ستۋدەنتتەر جانە كىتاپحانا وقىرماندارى قاتىستى.
جۇرەكتەرگە جول تارتقان بۇل شارا – تەك ەسكە الۋ عانا ەمەس، كەمەل تۇلعاعا تاعزىم، پاراسات بيىگىنەن ءۇن قاتۋ بولدى. كەش اياسىندا قانيپا ومارعالي قىزىنىڭ شاكىرت جۇرەگىنە شىراق جاققان ۇستازدىق بولمىسى جايلى تاعىلىمدى ەستەلىكتەر مەن جۇرەكجاردى لەبىزدەر ايتىلدى. كورەرمەن نازارىنا قانيپا ومارعالي قىزىنىڭ ءومىر جولى مەن ۇلت رۋحانياتىنا سىڭىرگەن ولشەۋسىز ەڭبەگى جايلى بەينەماتەريال ۇسىنىلدى.
قازاقستان جازۋشىلار وداعى شقو فيليالىنىڭ ديرەكتورى، جازۋشى، پۋبليسيست الىبەك قاڭتاربايەۆ ۇلت ۇستازىنىڭ ۇلاعاتتى جولى، ادەبيەتكە قوسقان ۇلەسى مەن جاڭاشىل ادىستەمەلىك مەكتەبى جايىندا پايىمدى پىكىرلەرىمەن ءبولىستى.
"قانيپا ەكەۋمىز ستۋدەنت كەزىمىزدەن تانىس ەدىك. سول كەزدىڭ وزىندە ول قازاق تىلىنە، ادەبيەتىنە، سالت-داستۇرىنە دەگەن ادالدىعىمەن كوزگە ءتۇستى. ونىڭ باتىلدىعى مەن شەشەندىگى ەرەكشە بولدى. وسىنداي اتى اڭىزعا اينالعان تۇلعانىڭ ەسىمىن ماڭگىلىككە قالدىرۋ كەرەك دەپ ەسەپتەيمىن – قالا مەكتەپتەرىنىڭ بىرىنە ونىڭ ەسىمى بەرىلىپ، ەسكەرتكىشى ورناتىلسا بولار ەدى"، - دەدى الىبەك قالي ۇلى.
ۇلاعاتتى ۇستازدىڭ كوزىن كورگەن، ەڭبەگىن باعالاعان قوعام قايراتكەرى ساعىمبەك اقانوۆ ءوز ەستەلىكتەرىمەن ءبولىسىپ، ۇستاز بەينەسىن سان قىرىنان اشتى. ال س. امانجولوۆ اتىنداعى شقۋ فيلولوگيا عىلىمدارىنىڭ دوكتورى، پروفەسسور، «ابايتانۋ» عىلىمي-زەرتتەۋ ينستيتۋتىنىڭ ديرەكتورى ايجان كارتايەۆا حان اپا جايىندا، ونىڭ ۇستازدىق جولى تۋرالى ءسوز سويلەدى. قانيپا اپايدىڭ شاكىرتتەرى قۋانىش ەركىن مەن ايبەك ورالحان ۇستازدارى جايلى ەستەلىگىمەن ءبولىسىپ، ارناۋىن ارنادى.
سونىمەن قاتار، قانيپا بىتىبايەۆانىڭ تۋعان سىڭلىلەرى جاڭىل، باقىت جانە باقىتگۇل ومارعاليقىزدارى اپكەلەرى جايلى جۇرەكجاردى ءسوز سويلەپ، وتباسى، وسكەن ورتاسى، تۇلعالىق بولمىسىنان سىر شەرتتى.
ۇلان اۋداندىق بالالار مۋزىكالىق مەكتەبىنىڭ ونەرپازدارى كەشتى اسەم اندەرىمەن ارلەدى.
«كەش سوڭىندا جامبىل اتىنداعى گيمنازيا وقۋشىلارى قانيپا بىتىبايەۆاعا ارنالعان سەرىك عابدۋللا ۇلىنىڭ «التىن ادام» اتتى ولەڭىن ەرەكشە ىقىلاسپەن وقىپ، ۇستاز رۋحىنا دەگەن ماڭگىلىك تاعزىمدى جۇرەكپەن جەتكىزدى.
ايتا كەتكەن ءجون، قانيپا بىتىبايەۆانىڭ 200-گە تارتا عىلىمي-ادىستەمەلىك ماقالاسى، 41 كىتابى جارىق كورگەن. عالىم-ۇستازدىڭ ىس-تاجىريبەسى جونىندە بىرنەشە وقۋ ءفيلمى ءتۇسىرىلىپ، 2004 جىلى «ءداۋىردىڭ دارا ۇستازى» اتتى كينو-وچەرك جاريالانعان. 2013 جىلى «ەگىز ءورىم» پەداگوگيكالىق ەسسەلەر جيناعى جارىق كوردى. كىتاپتىڭ العى ءسوزىن اقىن ج. اسكەربەك قىزى جازىپ، باسىلىم ب.م. ساپاربايەۆتىڭ قولداۋىمەن جارىق كورگەن ەدى. بۇل ونىڭ سوڭعى جۇمىسى بولاتىن. ۇلى ۇستاز 2014 جىلى 9 قىركۇيەكتە ومىردەن ءوتتى.
