A.S. Pýshkin atyndaǵy Shyǵys Qazaqstan oblystyq kitaphanasynda qazaq ádebietin oqytýda ózindik mektep qalyptastyrǵan dara pedagog, QR eńbek sińirgen qairatkeri, ult ustazy Qanipa Omarǵaliqyzy Bitibaevanyń 80 jyldyǵyna arnalǵan «Ańyzǵa ainalǵan ustaz» atty eske alý keshi ótti, dep habarlaidy Dalanews.kz
Sharaǵa ziialy qaýym ókilderi, ardager ustazdyń shákirtteri men týǵan-týystary, mektep oqýshylary, stýdentter jáne kitaphana oqyrmandary qatysty.
Júrekterge jol tartqan bul shara – tek eske alý ǵana emes, kemel tulǵaǵa taǵzym, parasat biiginen ún qatý boldy. Kesh aiasynda Qanipa Omarǵaliqyzynyń shákirt júregine shyraq jaqqan ustazdyq bolmysy jaily taǵylymdy estelikter men júrekjardy lebizder aityldy. Kórermen nazaryna Qanipa Omarǵaliqyzynyń ómir joly men ult rýhaniiatyna sińirgen ólsheýsiz eńbegi jaily beinematerial usynyldy.
Qazaqstan Jazýshylar odaǵy ShQO filialynyń direktory, jazýshy, pýblitsist Álibek Qańtarbaev ult ustazynyń ulaǵatty joly, ádebietke qosqan úlesi men jańashyl ádistemelik mektebi jaiynda paiymdy pikirlerimen bólisti.
"Qanipa ekeýmiz stýdent kezimizden tanys edik. Sol kezdiń ózinde ol qazaq tiline, ádebietine, salt-dástúrine degen adaldyǵymen kózge tústi. Onyń batyldyǵy men sheshendigi erekshe boldy. Osyndai aty ańyzǵa ainalǵan tulǵanyń esimin máńgilikke qaldyrý kerek dep esepteimin – qala mektepteriniń birine onyń esimi berilip, eskertkishi ornatylsa bolar edi", - dedi Álibek Qaliuly.
Ulaǵatty ustazdyń kózin kórgen, eńbegin baǵalaǵan qoǵam qairatkeri Saǵymbek Aqanov óz estelikterimen bólisip, ustaz beinesin san qyrynan ashty. Al S. Amanjolov atyndaǵy ShQÝ filologiia ǵylymdarynyń doktory, professor, «Abaitaný» ǵylymi-zertteý institýtynyń direktory Aijan Kartaeva Han apa jaiynda, onyń ustazdyq joly týraly sóz sóiledi. Qanipa apaidyń shákirtteri Qýanysh Erkin men Aibek Oralhan ustazdary jaily esteligimen bólisip, arnaýyn arnady.
Sonymen qatar, Qanipa Bitibaevanyń týǵan sińlileri Jańyl, Baqyt jáne Baqytgúl Omarǵaliqyzdary ápkeleri jaily júrekjardy sóz sóilep, otbasy, ósken ortasy, tulǵalyq bolmysynan syr shertti.
Ulan aýdandyq Balalar mýzykalyq mektebiniń ónerpazdary keshti ásem ánderimen árledi.
«Kesh sońynda Jambyl atyndaǵy gimnaziia oqýshylary Qanipa Bitibaevaǵa arnalǵan Serik Ǵabdýllaulynyń «Altyn adam» atty óleńin erekshe yqylaspen oqyp, ustaz rýhyna degen máńgilik taǵzymdy júrekpen jetkizdi.
Aita ketken jón, Qanipa Bitibaevanyń 200-ge tarta ǵylymi-ádistemelik maqalasy, 41 kitaby jaryq kórgen. Ǵalym-ustazdyń is-tájiribesi jóninde birneshe oqý filmi túsirilip, 2004 jyly «Dáýirdiń dara ustazy» atty kino-ocherk jariialanǵan. 2013 jyly «Egiz órim» pedagogikalyq esseler jinaǵy jaryq kórdi. Kitaptyń alǵy sózin aqyn J. Áskerbekqyzy jazyp, basylym B.M. Saparbaevtyń qoldaýymen jaryq kórgen edi. Bul onyń sońǵy jumysy bolatyn. Uly ustaz 2014 jyly 9 qyrkúiekte ómirden ótti.
