Mýzei ashylǵan soń uly oishyldyń murasy ulyqtalyp, Iasaýi fenomenin asqaqtatý arqyly ǵylym men týrizmdi birge damytý múmkindigi ashyla túsedi. Jańa murajaidyń kontseptsiiasymen tanysqan oblys ákimi Ómirzaq Shókeev joba jetekshilerine birqatar mindetter júktedi.
Uly oishyldyń el rýhaniiatyndaǵy ornyn joǵary baǵalaityn óńir basshysy murajaidy biregei jobaǵa ainaldyrý joldaryn kórsetip, oi qosty. Jańa mýzei ǵulamanyń álemine sapar shegip, kúlli kúnshyǵys musylmandarynyń rýhani ustazy bolǵan dini qairatkerdiń eńbekterin dáripteitin mádeni oshaq bolmaq.
Qoja Ahmet Iasaýi mýzeiiniń aýmaǵy – 3200 sharshy metr. Qurylysty «Samuryq-Qazyna» kompaniiasynyń tapsyrysymen «Bazis – A» kompaniiasy júrgizdi. Uly tulǵaǵa arnalǵan mýzeide keleshekte 100 adam jumyspen qamtylmaq.
Jalpy Túrkistandy týrizm ortalyǵyna ainaldyrý baǵytynda aýqymdy jumys atqarylyp jatyr. Túrkistan qalasyndaǵy týristik nysandar jaily aqparattar álemdegi eń iri «http://xn--ripadviser-mwi.com/» saiahatshylar portalyna engizildi. Óńirge keletin qonaqtar, týristermen jumys júrgizetin gid mamandaryn daiarlaý isi de jandana tústi.
Túrkistan oblysynda týrizm salasy tarihi-tanymdyq, emdik-saýyqtyrý jáne ekologiialyq týrizm bolyp, 3 baǵytta qarqyndy damyp keledi. Jyl sońyna deiin 38 týristik investitsiialyq joba júzege asady. Nátijesinde 1050 jańa jumys oryndary ashylady degen jospar bar. Solardyń ishinde Qoja Ahmet Iasaýi mýzeii de jurtshylyq jii keletin orynǵa ainalady degen senim mol.
