Abai ýniversitetinde «Qaiym Muhamedhanov – 110 jyl: Ult rýhaniiaty, ǵylym jáne abaitaný máseleleri» atty halyqaralyq simpoziým ótti. Simpoziým aiasynda «Qaiym Muhamedhanov atyndaǵy abaitaný dárishanasynyń» tusaýy saltanatty túrde kesilip, qatarynan birneshe kitaptyń tanystyrylymy boldy. Respýblikalyq deńgeidegi bul jolǵy alqaly jiyn ult rýhaniiatyna ólsheýsiz úles qosqan kórnekti ǵalym, abaitanýshy, tekstolog Qaiym Muhamedhanovtyń ǵylymi murasyn jańasha paiymdaýǵa arnaldy.
Dárishananyń tusaýyn Akademiialyq qyzmet jónindegi prorektor Baný Narbekova, Filologiia fakýltetiniń dekany Alýa Tańjaryqova, professor Faýziia Shamsiiaqyzy jáne ádebiettanýshy Baltabai Ábdiǵazin kesti. Simpoziýmǵa Qaiym Muhamedhanovtyń uly Degdar Qaiymuly men qyzy Dina Qaiymqyzy da arnaiy qatysyp, áke murasyna kórsetilgen qurmetke rizashylyqtaryn bildirdi.
Akademiialyq qyzmet jónindegi prorektory Baný Narbekova óz sózinde Qaiym Muhamedhanovtyń bar ǵumyryn alashtaný men abaitanýǵa arnaǵanyn atap ótti. «Qýǵyn-súrginge ushyrasa da taǵdyr synyna moiymaǵan tulǵanyń elge adal qyzmeti búgingi urpaqqa úlgi» dedi ol. Sonymen qatar, Qaiym Muhamedhanov atyndaǵy abaitaný dárishanasynyń ashylýy ádebiettanýshylar men pedagogtardy daiarlaityn qara shańyraq úshin tarihi mura jáne Abai qundylyqtaryn dáripteýge berik negiz bolatynyn jetkizdi.
Simpoziýmda quttyqtaý sóz sóilegen M.O.Áýezov atyndaǵy Ádebiet jáne óner institýtynyń direktory, akademik Kenjehan Matyjanov Qaiym Muhamedhanovtyń ǵylymi batyldyǵy men abaitanýdaǵy erekshe eńbegine toqtaldy.
– Qaiym Muhamedhanovtyń jetekshiligimen 30-dan asa dissertatsiia qorǵaldy. Búginde Abai shákirtteri men izbasarlary mektepter men joǵary oqý oryndarynda oqytylyp keledi. Bul – qazaq ádebietindegi biregei ǵylymi mektep, ult maqtanyshy. Osyndai jankeshti eńbegi úshin ol 1951 jyly saiasi qýǵyn-súrginge ushyrap, 25 jylǵa bas bostandyǵynan aiyryldy. Soǵan qaramastan, ǵumyr boiy Abai sóziniń túpnusqasyn saqtaýmen ainalysty, tekstologiialyq taldaý jasap, ǵylymi túsiniktemeler jazdy. Búgingi jastar erkin zamanda ómir súrip jatyr. Konstitýtsiianyń eń basty qundylyǵy – adamnyń erkindigi. Al osy erkindikti Qaiym Muhamedhanov syndy tulǵalar ǵumyr boiy armandady. Sizder baqyttysyzdar, – dedi akademik.
Sonymen qatar jiynda Shákárim ýniversitetiniń rektory Dýman Rymǵaliuly jáne Túrkiia Respýblikasy konsýldyǵynyń bilim jónindegi attashesi, professor Shúkir Kóshe quttyqtap sóz sóiledi. Olar da Qaiym Muhamedhanovtyń eńbegin joǵary baǵalap, simpoziým jumysy men abaitanýǵa arnalǵan dárishananyń ashylýy qazaq ǵylymy men mádenieti úshin tarihi qadam ekenin aitty.
Halyqaralyq simpoziým oflain jáne onlain formatta ótip, onda baiandama jasaǵan belgili ǵalymdar qazirgi abaitaný ǵylymy men Q.Muhamedhanovty bailanystyra tyń ideialaryn ortaǵa saldy. Shara barysynda Qaiym Muhamedhanovtyń eńbekteri men ǵalymǵa arnalǵan birneshe ǵylymi basylymnyń tusaýy kesildi. Kitaptardy Qaiym Muhamedhanuly atyndaǵy Bilim jáne mádeniet ortalyǵynyń direktory, ǵalymnyń qyzy Dina Qaiymqyzy ýniversitet qoryna syiǵa tartty.
