Mańǵystaý oblysynda demalýshylardyń áreketi qoǵamnyń narazylyǵyn týǵyzdy. Áleýmettik jelide «Qamaldar ańǵary» atalyp ketken Airaqty-Shomanai shatqalynda jol talǵamaityn kóliktermen drift jasaǵan video tarady. Bul jaǵdaiǵa politsiia da pikir bildirdi, dep habarlaidy Dalanews.kz.
Aqtaý qalasynyń turǵyny Azamat Sársenbaev bul aýmaqta túsirilgen videony jariialaǵan, dep jazady Lada.kz. Kadrlardan demalýǵa kelgenderdiń áktas taýlardyń eteginde, dala betinde kólikpen ainalyp, drift jasaǵanyn kórýge bolady.
Jeli qoldanýshylary mundai áreketter topyraqtyń búlinýine jáne ósimdik jamylǵysynyń joiylýyna ákeletinin aityp, alańdaýshylyq bildirdi. Video keńinen talqylanyp, kópshilik avtordy qoldap, bolǵan jaǵdaiǵa narazylyq tanytty.
Sonymen qatar, óńir turǵyndary Mańǵystaýdaǵy tanymal jerlerge tabiǵat aiasynda tynyǵyp, tynyshtyq izdep baratynyn, alaida kei demalýshylardyń qatty mýzyka qosyp, jarys uiymdastyryp, drift jasaý arqyly tynyshtyqty buzatynyn jetkizdi.
Mańǵystaý oblystyq politsiia departamenti bul oqiǵaǵa qatysty túsinikteme bergen. Vedomstvonyń málimetinshe, drift jasaǵan júrgizýshi jol qozǵalysy erejelerin birneshe ret buzǵan.
«Quqyq buzýshynyń jeke basy anyqtaldy. Ol – 24 jastaǵy júrgizýshi. Ol kólikti memlekettik tirkeý nómirinsiz qaita basqarǵan. Buǵan deiin de osyndai quqyq buzýshylyq úshin jaýapkershilikke tartylǵan. Oǵan birneshe ákimshilik quqyq buzýshylyq boiynsha shara qoldanyldy: apatty jaǵdai týǵyzý, abattandyrý qaǵidalaryn buzý jáne kólik quraldaryn paidalaný erejelerin qaita buzý. Avtokólik arnaiy aiypturaqqa qoiyldy», – dep habarlady vedomstvo.
