Májilis depýtaty Ashat Rahymjanov Bas prokýratýra men UQK-den Djeffrı Epshteınniń faıldarynda aty atalǵan barlyq qazaqstandyqtardy, sondaı-aq olarmen baılanysy bolýy múmkin tulǵalardy tekserýdi surady. Depýtat bul kezdesýlerdiń sıpatyn anyqtaýdy talap etti, dep habarlaıdy Dalanews.kz.
Onyń aıtýynsha, qupıa aqparattyń, sonyń ishinde memlekettik qupıalardyń syrtqa shyǵý qaýpin joqqa shyǵarýǵa bolmaıdy. Depýtattyq saýal 25 aqpanda Berik Asylovqa jáne UQK tóraǵasy Ermek Saǵymbaevqa joldanǵan.
Rahymjanovtyń sózinshe, damyǵan demokratıalyq elderde bul daýǵa qatysy bar tulǵalarǵa qatysty parlamenttik tergeýler men qylmystyq qýdalaý bastalyp ketken.
"Muny jabýly qazan kúıinde qaldyrýǵa bolmaıdy. Qujattarda «Eski Qazaqstannyń» joǵarǵy eshelonynda bolǵan, mańyzdy memlekettik qyzmet atqarǵan adamdar atalady. Bul endi olardyń jeke ómiri emes, memlekettiń qaýipsizdigi men eldiń bedeline qatysty másele. Mysaly, burynǵy premer-mınıstr ári UQK-niń eks-tóraǵasy Kárim Másimov jazbalarda keminde segiz ret kezdesedi", – dedi depýtat.
Ol memleketke opasyzdyq jasaǵany úshin sottalǵan burynǵy elıta ókiliniń Epshteınmen ne sebepti kezdeskenin, tipti bul kezdesýler sol atyshýly aralda ótken-ótpegenin anyqtaýdy surady. Ashat Rahymjanov nazar aýdarǵan ekinshi tulǵa Ulttyq banktiń burynǵy tóraǵasy jáne eks-premerdiń orynbasary Qaırat Kelimbetov. Sondaı-aq memlekettik qaýipsizdikke jaýapty bolǵan joǵary shendi general týraly da aıtyldy.
"Faıldarda Epshteınniń Qazaqstandaǵy baılanystary tolyq kórsetilmeýi múmkin. Qazaqstandyq joǵary laýazymdy sheneýnikterdiń mundaı adammen kez kelgen baılanysy suraq týdyrady. Epshteın Qazaqstanǵa qandaı maqsatpen jıi keldi? Kimdermen baılanysta boldy? Olarǵa qatysty kompromat jınady ma? Qoljetimdiligi shekteýli aqparattyń syrtqa shyǵýy boldy ma? Qoǵam shyndyqty bilýge quqyly", – dep túıindedi depýtat.
Qujattardyń jarıalanýy AQSH-ta «Epshteın faıldaryn» ashý týraly zań aıasynda júrgizilgen aýqymdy derekterdi jarıalaý naýqanynyń bir bóligi boldy. Bul zańǵa AQSH-tyń burynǵy prezıdenti Donald Tramp qol qoıǵan.
AQSH Ádilet mınıstrliginiń saıtynda pedofılıa isine qatysty hat almasýlar, jazbalar men ishki materıaldardy qamtıtyn úsh mıllıonnan astam bet jarıalanǵan.
