Tarazda 200-ge jýyq turǵyn tozyǵy jetken kópqabatty úide turyp jatyr. Aitýlarynsha, olardyń úii áli kúnge deiin ákimdiktiń kondominiým tizimine enbegen. Sonyń saldarynan turǵyndar birneshe jyldan beri jóndeý jumystaryna qol jetkize almai keledi, dep habarlaidy Dalanews.kz Inbusiness.kz-ke silteme jasap.
48 páterdiń ieleri keiingi úsh jylda qujat jinap, jóndeý úshin ótinish tapsyrǵanymen, másele sheshimin tappaǵan. Búginde 50 jyldan astam ýaqyt buryn salynǵan úidiń shatyry tesilip, jańbyr jaýsa sý páterlerge deiin ótedi. Qubyrlary ábden tozyp, qabyrǵalary jaryla bastaǵan.
Turǵyndardyń aitýynsha, kóktemgi jaýyn kezinde jaǵdai tipti qiyndai túsedi. Úidiń tóbesinen aqqan sý qabyrǵalardy kógertip, sylaqtardyń túsýine sebep bolǵan. Kei jerlerde jaryqtar paida bolǵan.
"Jańbyr jaýsa jurt qýanady, biz qorqamyz. Sebebi tóbeden sý aǵady. Qysqa tuiyqtalý bolyp kete me dep alańdaimyz. Sý durys kelmeidi, jylý da joqtyń qasy", – deidi turǵyndardyń biri Tolqyn Eseeva.
Sondai-aq úidiń jertólesin káriz sýy basyp turady. Eski qubyrlar shirip ketkendikten, ǵimarat ishinde jaǵymsyz iis taraǵan. Turǵyndar jylý júiesi men elektr jelileriniń de eskirgenin aitady.
"Jyl saiyn jóndeimiz dep ýáde beredi. Úsh jyldan beri qujat tapsyryp júrmiz. Ákimdikke talai bardyq, biraq nátije joq", – deidi taǵy bir turǵyn Merýert Sametova.
Al qala ákimdigi bul máseleni rastady. Alaida sheneýnikterdiń sózinshe, keibir páter ieleri qajetti qujattardy tolyq tapsyrmaǵandyqtan, úi kondominiým tizimine engizilmegen.
Taraz qalalyq turǵyn úi qatynastary bóliminiń bas mamany Nurjan Bákirbaevtyń aitýynsha, bul úi boiynsha jinalys 2018 jyly ótken.
"Sol kezde turǵyndardyń kóbi baǵdarlamaǵa qatysýǵa kelispegen. Sondyqtan Makarov kóshesi, 20B mekenjaiyndaǵy úi tizimge engizilmedi", – dedi ol.
Resmi málimetke súiensek, búginde Tarazda 600-ge jýyq kópqabatty úi jańǵyrtýdan ótken. Bul jumystarǵa 23 milliard teńge jumsalǵan. Alaida qalada áli de jóndeýdi qajet etetin 538 turǵyn úi bar.
