تارازدا 200-گە جۋىق تۇرعىن توزىعى جەتكەن كوپقاباتتى ۇيدە تۇرىپ جاتىر. ايتۋلارىنشا، ولاردىڭ ءۇيى ءالى كۇنگە دەيىن اكىمدىكتىڭ كوندومينيۋم تىزىمىنە ەنبەگەن. سونىڭ سالدارىنان تۇرعىندار بىرنەشە جىلدان بەرى جوندەۋ جۇمىستارىنا قول جەتكىزە الماي كەلەدى، دەپ حابارلايدى Dalanews.kz Inbusiness.kz-كە سىلتەمە جاساپ.
48 پاتەردىڭ يەلەرى كەيىنگى ءۇش جىلدا قۇجات جيناپ، جوندەۋ ءۇشىن ءوتىنىش تاپسىرعانىمەن، ماسەلە شەشىمىن تاپپاعان. بۇگىندە 50 جىلدان استام ۋاقىت بۇرىن سالىنعان ءۇيدىڭ شاتىرى تەسىلىپ، جاڭبىر جاۋسا سۋ پاتەرلەرگە دەيىن وتەدى. قۇبىرلارى ابدەن توزىپ، قابىرعالارى جارىلا باستاعان.
تۇرعىنداردىڭ ايتۋىنشا، كوكتەمگى جاۋىن كەزىندە جاعداي ءتىپتى قيىنداي تۇسەدى. ءۇيدىڭ توبەسىنەن اققان سۋ قابىرعالاردى كوگەرتىپ، سىلاقتاردىڭ تۇسۋىنە سەبەپ بولعان. كەي جەرلەردە جارىقتار پايدا بولعان.
"جاڭبىر جاۋسا جۇرت قۋانادى، ءبىز قورقامىز. سەبەبى توبەدەن سۋ اعادى. قىسقا تۇيىقتالۋ بولىپ كەتە مە دەپ الاڭدايمىز. سۋ دۇرىس كەلمەيدى، جىلۋ دا جوقتىڭ قاسى"، – دەيدى تۇرعىنداردىڭ ءبىرى تولقىن ەسەيەۆا.
سونداي-اق ءۇيدىڭ جەرتولەسىن كارىز سۋى باسىپ تۇرادى. ەسكى قۇبىرلار ءشىرىپ كەتكەندىكتەن، عيمارات ىشىندە جاعىمسىز ءيىس تاراعان. تۇرعىندار جىلۋ جۇيەسى مەن ەلەكتر جەلىلەرىنىڭ دە ەسكىرگەنىن ايتادى.
"جىل سايىن جوندەيمىز دەپ ۋادە بەرەدى. ءۇش جىلدان بەرى قۇجات تاپسىرىپ ءجۇرمىز. اكىمدىككە تالاي باردىق، ءبىراق ناتيجە جوق"، – دەيدى تاعى ءبىر تۇرعىن مەرۋەرت سامەتوۆا.
ال قالا اكىمدىگى بۇل ماسەلەنى راستادى. الايدا شەنەۋنىكتەردىڭ سوزىنشە، كەيبىر پاتەر يەلەرى قاجەتتى قۇجاتتاردى تولىق تاپسىرماعاندىقتان، ءۇي كوندومينيۋم تىزىمىنە ەنگىزىلمەگەن.
تاراز قالالىق تۇرعىن ءۇي قاتىناستارى ءبولىمىنىڭ باس مامانى نۇرجان باكىربايەۆتىڭ ايتۋىنشا، بۇل ءۇي بويىنشا جينالىس 2018 جىلى وتكەن.
"سول كەزدە تۇرعىنداردىڭ كوبى باعدارلاماعا قاتىسۋعا كەلىسپەگەن. سوندىقتان ماكاروۆ كوشەسى، 20ب مەكەنجايىنداعى ءۇي تىزىمگە ەنگىزىلمەدى"، – دەدى ول.
رەسمي مالىمەتكە سۇيەنسەك، بۇگىندە تارازدا 600-گە جۋىق كوپقاباتتى ءۇي جاڭعىرتۋدان وتكەن. بۇل جۇمىستارعا 23 ميلليارد تەڭگە جۇمسالعان. الايدا قالادا ءالى دە جوندەۋدى قاجەت ەتەتىن 538 تۇرعىن ءۇي بار.
