Memleket basshysy Jetisý oblysynyń ákimi Beibit Isabaevty qabyldady, dep habarlaidy Dalanews.kz.
Qasym-Jomart Toqaevqa óńirdiń áleýmettik-ekonomikalyq damýy men aldaǵy josparlary týraly baiandaldy.
Beibit Isabaev 2025 jyldyń qorytyndysy boiynsha barlyq negizgi maqsatty indikatorǵa qol jetkizilgenin aitty. Óńirge 610 milliard teńge investitsiia tartylǵan, bul aldyńǵy jylmen salystyrǵanda 12,8 paiyzǵa artyq.
Prezidentke agroónerkásip keshenin damytý jospary tanystyryldy. Aýyl sharýashylyǵy daqyldary, sonyń ishinde qant qyzylshasy alqaby keńeidi. Aqsý jáne Kóksý qant zaýyttarynyń óndiristik qýatyn 2 esege arttyryp, 950 myń tonnaǵa jetkizý jumystary júrgizilip jatyr. 2027 jylǵa deiin quny 94,4 milliard teńge bolatyn 23 investitsiialyq jobany iske asyrý josparlanǵan. Atap aitqanda, qus fabrikalary, mal bordaqylaý alańdary, balyq jáne jylyjai sharýashylyqtary men basqa da jobalar bar.
Ónerkásip salasynda sońǵy úsh jylda 29 jańa nysan iske qosylyp, 7 kásiporyn keńeitildi, sonyń nátijesinde 1841 jumys orny ashyldy.
Memleket basshysyna infraqurylymdy damytý jaiynda málimet berildi. Óńirdi gazdandyrý deńgeii 67,2 paiyzǵa jetti. «Taldyqorǵan – Úsharal» magistraldi gaz qubyry tartylyp, 650 myńnan astam turǵyny bar 210 eldi meken kógildir otynǵa qol jetkizedi.
Oblystyń týrizm salasyndaǵy múmkindikterin keńeitý baǵytynda jumystar jalǵasýda. Alakól, Balqash jaǵalaýlarynda týristik nysandarǵa baratyn joldar salynyp, aýyz sý, elektr jelisi, káriz júieleri tartyldy. Jaǵalaýlardy bekitý sharalary qolǵa alyndy. Burqanbulaq sarqyramasyna aparatyn 31 shaqyrymdyq jol jańartylyp jatyr.
«Taza Qazaqstan» ekologiialyq baǵdarlamasy aiasynda óńirde úsh ekopark salyp, 121 myń aǵash egý kózdelgen.
Memleket basshysy oblys ákimine Qytai Halyq Respýblikasymen shekaralas «Dostyq» beketindegi jáne «Qorǵas» arnaiy ekonomikalyq aimaǵyndaǵy jumystardy tiimdi uiymdastyrý, sondai-aq Alakól, Balqash kólderi jaǵalaýyndaǵy demalys oryndaryn, taý týrizmin qarqyndy túrde damytý jóninde birqatar tapsyrma berdi.
