Almatydaǵy Qazaqstan baspasóz klýbynda qańǵybas janýarlardy evtanaziialaýdy qarastyratyn zań jobasyna qarsy zooqorǵaýshylardyń baspasóz máslihaty ótti. Jiynǵa qoǵam belsendisi Arýjan Sain bastaǵan janýarlardy qorǵaýshylar qatysty, dep habarlaidy Dalanews.kz.
Qoǵamda atalǵan zań jobasyna qatysty pikirtalas kúsheiip tur. Osy tusta spikerlerge "Qaisysy mańyzdy: qańǵybas itterdiń ómiri me, álde balalardyń ómiri me?" degen saýal qoiyldy. Jýrnalist mysal retinde 2022 jyly Aqtóbe oblysynda itterge talanyp, qaza tapqan balanyń oqiǵasyn alǵa tartty.
Alaida Arýjan Sain bul máselege jaýap bere otyryp, balalardyń qańǵybas itterden zardap shegýin basqa da qaiǵyly jaǵdailarmen salystyrdy.
"Ókinishke qarai, álemde balalar túrli jaǵdaida zardap shegip jatady. Olar soǵys kezinde de, qylmyskerlerdiń qolynan da, túrli jazataiym oqiǵalardan da japa shegedi. Árine, bárimiz balalardy tolyq qorǵaǵymyz keledi, biraq olardy barlyq qaýipten tolyq saqtaý árdaiym múmkin bola bermeidi", – dedi ol.
Sonymen qatar Arýjan Sain balalardyń qaýipsizdigine eń aldymen eresekter jaýapty ekenin aitty. Onyń sózinshe, ata-analar balalaryn qaýipti bolýy múmkin jerlerde qaraýsyz qaldyrmaýy kerek.
"Ásirese kishkentai balalardy qaraýsyz qaldyrýǵa bolmaidy. Balaǵa qaýip tónýi múmkin jerde jalǵyz júrýge jol bermeý qajet. Bul tek janýarlarǵa qatysty másele emes, bul – eresekterdiń de jaýapkershiligi", - dedi qoǵam belsendisi.
Soǵan qaramastan zooqorǵaýshylar qańǵybas janýarlar sanyn azaitý úshin evtanaziia qoldanýǵa qarsy ekenin jetkizdi. Olardyń pikirinshe, basty sheshim – janýarlardy sterilizatsiialaý. Alaida bul tásil janýarlardy kósheden alyp ketpei, tek kóbeiýin shekteýge baǵyttalǵan.
