Qazaqstanda pedagogterdi attestatsiialaý júiesine birqatar ózgerister engiziledi, dep habarlaidy Dala News.
Oqý-aǵartý ministrliginiń málimetinshe, reformanyń negizgi maqsaty – muǵalimderdiń eńbegin ádil ári ashyq baǵalaý júiesin qalyptastyrý jáne artyq talaptar men negizsiz qarjylyq shyǵyndardy qysqartý.
Jańa model pedagogterdiń kásibi nátijelerine negizdelip, baǵalaý úderisi barynsha túsinikti ári obektivti formatqa kóshiriledi.
Negizgi ózgeristerdiń biri – muǵalimderdiń bilimin baǵalaý úshin testileýdiń tolyq alynyp tastalýy.
Alaida testileý:
- jas mamandar úshin;
- pedagogikalyq qyzmetke qaita oralǵysy keletinder úshin;
- bilim berý uiymdarynyń basshylary, olardyń orynbasarlary jáne ádiskerler úshin saqtalady.
Jańa talaptarǵa sáikes, mektepte keminde 2 jyl úzdiksiz jumys istegen pedagogter biliktilik sanatyn alý úshin ótinish bere alady. Baǵalaý olardyń praktikalyq qyzmet nátijeleri boiynsha júrgiziledi.
Portfolio:
- pedagogtiń jetistikteri;
- oqýshylardyń nátijeleri;
- sabaq sapasy men tárbie jumysynyń kórsetkishteri negizinde qalyptastyrylady.
Sonymen qatar barlyq deńgeiler úshin avtorlyq baǵdarlamalar men oqý-ádistemelik materialdardy usyný talaby alynyp tastalady.
Jańa júie 2027 jyldan bastap engiziledi.
Oǵan deiin ótpeli kezeń qarastyrylǵan. Eger pedagog alǵashqy árekette qajetti ball jinai almasa, onyń qoldanystaǵy sanaty men ústemaqylary saqtalady.
Mundai pedagogterdiń attestatsiiasy 2026–2027 oqý jylyna aýystyrylyp, jańa erejeler boiynsha, testileýsiz ótedi.
Sondai-aq qaita test tapsyrý (aqyly negizde) tájiribesi de joiylady. Buǵan deiin tólengen qarajat tolyq qaitarylady.
Qazirgi ýaqytta jańa formattaǵy attestatsiia erejeleri ázirlenip jatyr.
Ministrlik bul ózgerister boiynsha BAQ ókilderine arnalǵan brifing ótkizýdi josparlap otyr.
