«Halyq únine qulaq asatyn memleket» tujyrymdamasyna tirek bolatyn qujat Túrkistanda tanystyryldy
1 shildeden bastap elimizde Ákimshilik rásimdik-protsestik kodeksi kúshine enedi jáne azamattardyń memlekettik organdarǵa jazǵan aryz-ótinishi «e-Ótinish» bazasyna enedi. Ol boiynsha azamattardyń ótinishteri memlekettik organdarǵa birtutas aqparattyq júie arqyly túsetin bolady. Kezeń-kezeńmen júzege asatyn aqparattyq júie bilik pen qoǵamnyń qarym-qatynasyn kúsheitpek. «Halyq únine qulaq asatyn memleket» tujyrymdamasyna tirek bolar basty qujat Túrkistan oblysynyń ákimdiginde ótken kezdesýde tanystyryldy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Óńirge is-saparmen kelgen QR Prezidentiniń kómekshisi – QR Prezidenti Ákimshiliginiń ótinishterdi qaraýdy baqylaý bóliminiń meńgerýshisi Tamara Dúisenova jergilikti atqarýshy organdardyń basshylarymen kezdesip, «e-Ótinish» aqparattyq júiesin engizý jumystaryna oń baǵa berdi. «E-Ótinish» aqparattyq júiesin engizýdiń ózektigili men mańyzdylyǵyn, Ákimshilik rásimdik-protsestik Kodeksiniń jumysyn keńinen túsindirdi.
– Prezident 2020 jyldyń 29 maýsymynda qol qoiǵan QR Ákimshilik rásimdik-protsessýaldyq kodeksi biylǵy 1-shildeden bastap kúshine enedi. Jańa Kodeks – Memleket basshysynyń 2019 jylǵy 2 qyrkúiektegi Qazaqstan halqyna joldaýynda aitylǵan «Halyq únine qulaq asatyn memleket» Kontseptsiiasynyń irgeli normativtik qujaty. Qoǵamdyq áleýmettik belsendilikti eskersek, bul qujattyń mańyzdylyǵyn túsinýge bolady. Halyqtyń aryz-ótinishi «e-Ótinish» bazasyna enip, onyń oryndalý barysy osynda jinaqtalady. Endi memlekettik organ ótinishti qaraǵan kezde basqa organdar tarapynan qandai sheshimder qabyldanǵanyn kóre alady. Barlyq aqparat sol jerde jinaqtalady. Basty ustanym – azamattar ótinishine sapaly jaýap berý, – dedi QR Prezidentiniń kómekshisi – QR Prezidenti Ákimshiliginiń ótinishterdi qaraýdy baqylaý bóliminiń meńgerýshisi Tamara Dúisenova.
Memlekettik organdardyń aryz-ótinish ielerine qaitarǵan jaýabynyń durys-burystyǵy qajet bolsa, sotta qaralady. Turǵyndardyń máselesine júrdim-bardym qarap, áýre-sarsańǵa salǵandar jaýapqa da tartylady. Shaǵymdaný kezinde sheshimderdiń nemese jaýaptardyń negizdiligin memlekettik organ dálildeidi. Bul rette jańa ákimshilik sottar qurylady.
Óńirde atalǵan júie engizilip, damytylýda. Zańnamany memlekettik organdar men azamattarǵa túsindirme jumystary júrgizilýde. Ótinish berýshi «e-Ótinish» birtutas aqparattyq júiesi arqyly óz ótinishiniń memlekettik organdarda qaralý barysyn qadaǵalai alady. Jáne dálelder keltirip, olardy zerdeleýge qatysyp, túsinikteme berý, qajetti qujattardy usyný quqyǵyna ie bolady.
Eger memlekettik organnan alǵan jaýabyna qanaǵattanbasa, onyń joǵary satyda turǵan organǵa shaǵym keltirýge, odan keiin sheshim qabyldaǵan memlekettik organdy talap aryzben sotqa berýge quqyǵy bar.
Azamattar men biznes ókilderiniń talap aryzyn arnaiy ákimshilik sottar memlekettik organdardyń «kinálilik prezýmptsiiasy» qaǵidaty boiynsha qaraityn bolady. Iaǵni ótinish berýshi emes, memlekettik organ ózi qabyldaǵan sheshiminiń nemese bergen jaýabynyń durystyǵyn dáleldep, negizdeidi. Ótinishterdi qaraý merzimi 30-dan 15 kúnge qysqartylady.
Qazirgi tańda ortalyq memlekettik jáne jergilikti atqarýshy organdar 100% aqparattyq júiege qosylǵan, el kóleminde pilottyq qoldaný bastaldy.
