Memleket basshysy Ómirzaq Shókeevti qabyldady
Qasym-Jomart Toqaevqa Ómirzaq Shókeev oblysta kovid-menedjment boiynsha júieli jumys jasalǵanyn, sanitarlyq-epidemiialyq tártiptiń qatań saqtalǵanyn, halyqqa ekpe egý isiniń qarqyndy júrip jatqanyn aitty. Jalpy Túrkistan oblysy boiynsha 1 million adamǵa ekpe egilýi kerek bolsa, búginde 200 myń adamǵa vaktsina salynǵan. Aimaqtaǵy juqpaly aýrýlar aýrýhanalaryndaǵy tósek-oryndar men dári-dármek qory jetkilikti, qajetti quraldarmen jabdyqtalǵan. Óńir basshysynyń aitýynsha, qazir oblys «jasyl aimaqta», soǵan sáikes keibir shekteýler alynyp jatyr.
Biyl Túrkistan oblysynyń qurylǵanyna 3 jyl tolady. Memleket basshysyna osy aralyqta atqarylǵan jumystar men óńirdegi ózgerister týraly aityldy. Ómirzaq Shókeev oblystyń jalpy ishki ónimi 41 paiyzǵa óskenin, investitsiia 2,4 ese artqanyn, qurylys salasynda iri jobalar iske asqanyn, aýyl sharýashylyǵy, shaǵyn jáne orta biznes boiynsha oń kórsetkish bar ekenin atap ótti.
Oblys ákimi Túrkistan qalasynda qolǵa alynǵan jumystar jóninde bólek baiandady. Qalada 250-den astam joba júzege asyrylǵan. Túrkistanǵa 445 milliard teńge investitsiia tartylǵan. Sonymen qatar Ómirzaq Shókeev aldaǵy ýaqytta atqarylatyn jobalar týraly da málimet berdi.
Memleket basshysy Úkimetpen birlesip Túrkistan oblysyn damytýdyń 2018-2024 jyldarǵa arnalǵan keshendi josparyn qaita jańartýdy tapsyrdy.
