Vitse-ministr: «Qytaidan eski zaýyttar ákelinbeidi»
QR Syrtqy ister vitse-ministri Ermek Kósherbaev áleýmettik jelilerde taralyp jatqan aqparatty joqqa shyǵaryp otyr. Onyń sózine qaraǵanda, Qazaqstanǵa eski zaýyttar kóshirilmeidi.
– Meniń estýimshe, blogerler taratatyn jáne WhatApp-ta júrgen rolikterde «Qazaqstanǵa 55 eski zaýyt kóshiriledi» degen áńgime bar. Ondai baǵdarlama joq. Eski zaýyttardy eshkim ákelmeidi. Ondai oi bolsa da, bizdiń komissiia oǵan jol bermeidi. Sebebi barlyq jobany biz ózimiz tańdaimyz, tiisti memlekettik saraptamadan da ótkizip turamyz, – dep atap kórsetti Kósherbaev.
Eki eldiń birlesken 55 jobasyna birneshe ministrlik jaýapty. Olar – indýstriia jáne infraqurylymdyq damý ministrligi (27 joba), aýyl sharýashylyǵy ministrligi (7 joba), energetika ministrligi (20 joba). Sondai-aq, bir joba «Astana» halyqaralyq qarjy ortalyǵyna tiesili.
Indýstriia jáne infraqurylymdyq damý vitse-ministri Amaniiaz Erjanovtyń aitýynsha, barlyq joba Qazaqstan men Qytai úkimeti arasyndaǵy kelisimniń negizinde qolǵa alynyp otyr. Osy ýaqytqa deiin 8 joba iske qosyldy.
– Máselen, biyl úlken diametrli bolat qubyrlaryn shyǵaratyn kásiporyn paidalanýǵa beriledi. Sol jerde 300 jańa jumys orny ashylady. Budan bólek, osy jobalardyń aiasynda jergilikti mamandardy oqytý, sheteldik mamandarmen tájiribe almasý jáne qazaqstandyq jumysshylardyń biliktiligin arttyrý josparlanǵan. Sonyń nátijesinde sheteldik jumys kúshi aitarlyqtai azaiady, – dedi Erjanov búgingi baspasóz máslihatynda.
Vitse-ministrdiń sózine qaraǵanda, árbir jobanyń qurylysyna jáne ol paidalanýǵa berilgen alǵashqy kezeńde sheteldik mamandar tartylady. Artynan jergilikti mamandardy oqytý arqyly sheteldik qyzmetkerlerdi almastyrý josparlanǵan.
– Mysaly, osy ýaqytqa deiin paidalanýǵa berilgen barlyq kásiporynda, kóbinese, ózimizdiń mamandarymyz jumys istep júr. Aqtoǵai taý-ken kombinatyn alaiyq, bas kezinde ol jerde qytailyq mamandar qyzmet etti. Búginde kombinattyń basshylyq quramyna otandyq mamandar ǵana kiredi, – dep atap kórsetti Erjanov.
Birlesken 55 jobanyń jalpy quny – 27,5 milliard dollar. Olar kólik qurastyrý, qurylys, aýyl sharýashylyǵy jáne agroónerkásip ónimderin shyǵarý, himiia men farmatsevtika, munai-gaz, energetika jáne taǵy basqa salalardy qamtidy.
– Osy jobalardyń negizinde birqatar joǵary tehnologiialyq kásiporyndar qurylady degen josparymyz bar. Sonyń arqasynda joǵary sapaly otandyq ónimder shyǵarylady, – dep atap kórsetti Erjanov.
