Ýkrainanyń Bas prokýratýrasy Reseidiń qorǵanys ministri Sergei Shoigýǵa jáne taǵy 17 joǵary laýazymdy reseilik sheneýnikke izdeý jariialady. Olarǵa el beibitshiliginiń, qoǵamdyq tártiptiń, ulttyq qaýipsizdiginiń negizderine qarsy aýyr qylmys jasaǵan degen aiyptar taǵyldy. Bul týraly bas prokýror Iýrii Lýtsenko málimdedi.
Onyń aitýynsha, sheneýnikterdiń áreketi eki myńnan astam ýkrainalyq sarbazdyń ólimine ákep soqtyrdy, solardyń kesirinen segiz myń jaýynger jaralandy, buǵan qosa shamamen 50 mlrd dollardyń múlki men tehnikasy joiyldy. Lýtsenkonyń habarlaýynsha, prokýratýra qazir Resei prezidenti Vladimir Pýtin men premer-ministri Dmitrii Medvedevke aiyptar ázirlep jatyr.
Baspasóz konferentsiiasynda Resei prezidentiniń kómekshisi Sergei Glazev pen reseilik Dýma depýtaty Konstantin Zatýlinniń telefon áńgimeleriniń jazbasy tyńdatyldy. Sheneýnikter Odessa men Harkovtegi jappai tártipsizdikti uiymdastyrý jáne qarjylandyrý máselelerin talqylaǵan. Tergeý ókilderi saraptamanyń aýdiotaspada Glazev pen Zatýlinniń daýystary ekenin rastaǵanyn málimdedi.
Bas prokýratýranyń habarlaýynsha, qazirgi tańda Reseidiń 39 azamaty qylmystyq jaýapkershilikke tartyldy. Olardyń barlyǵyn Kiev Ýkrainaǵa qarsy soǵys ashýǵa aiypty dep esepteidi.
Donbastaǵy janjal 2014 jyly kóktemde Qyrymnyń reseilik anneksiiasynan soń bastaldy. Kiev jáne Batys elderi Reseidi separatisterge qoldaý kórsetti dep aiyptaidy. Kreml bul aiyptaýlardy joqqa shyǵaryp otyr.
