Shırek ǵasyr ótkesin bul dúnıe sál saıabyrsydy. Árıne, birinshi kezekte Prezıdenttiń arqasynda. Qazaq pen qazaqtyń jerin meken etken ózge ulttardy bir judyryqqa jumyldyra alǵan Nursultan Nazarbaev is júzinde tatýlyǵy men turaqtylyǵy saqtalǵan memleket qurdy.

Dál qazir Qazaqstan elimizdegi kóptegen ult ókilderi úshin «qoı ústine boztorǵaı jumyrtqalaǵan el». Endi she, ózińiz alyp qarańyz, Qazaqstanda qazaq mektepterimen qatar ózbek, uıǵyr, ýkraın mektepteri bar. Ár ult óz aldyna ulttyq-mádenı ortalyǵyn quryp alǵan.

Bul neni bildiredi? Bul elimizdegi árbir azamat teń quqyly degen sóz. Elimizdegi eshbir ult ókilderi eshnárseden kemistik kórip otyrǵan joq. Solaı.

Soǵan qaramaı, eldegi orystildi qaýym Qazaqstannan kóship jatyr. Nege? Ne boldy eken?

Árıne, árbir otbasynyń elden kóshken kezdegi óz sebebi bary túsinikti. Biraq, tereńine úńilsek orystildilerge Qazaqstannan kóshýge eki nárse túrtki bolyp otyr. Siz tyńdańyz. Biz aıtaıyq.

Alǵashqysy. Qoǵamda qazaq tilinniń róli artyp keledi. Qazaqshalap aıtsaq, mysy basyp barady. Til ǵana emes,

osy eldiń, osy jerdiń qojaıyny sanalatyn qazaqtyń sany ósýde.

Qazirdiń ózinde qazaqtardyń sany 70 paıyzǵa jaqyndap qaldy. Táýelsizdiktiń eleń-alańynda bul kórsetkish 50 paıyzǵa da jetpeıtin.

Bul neni bildiredi? Orystildi qaýymǵa jaqpasa da aıtaıyq,

Qazaqstan ulttyq memleketke aınalyp kele jatyr. Bir ǵana ult turatyn, bir ǵana ult meken etetin…

Árıne, alańdatady. Elimizdegi orystildi azamattar alańdaıdy buǵan. Sebebi, osy ýaqytqa deıin memlekettik tildi meńgermegen olar. Osy sebepti erteńin oılaıdy. Óziniń ǵana emes, balalarynyń da…

Másele nede? Ulttyq memleketke aınalyp kele jatqan Qazaqstanda orystildi qaýymǵa tek eki jol bar.

Biri – qazaqpen sińisý, onyń tilin meńgerý, dilin túsiný. Ekinshisi – kóshý.

Budan keıingi sebep – Ýkraınadaǵy oqıǵalar. Onyń ishinde Donbass.

Elimizdegi orystildi qaýym Reseı Ýkraınadaǵy áreketin qaıtalap, óziniń «orys álemin» ıdeıasyn Qazaqstanǵa tyqpalar bolsa, «eki túıeniń ortasynda shybyn ólediniń» taǵdyryn qaıtalaýdan qatty qorqady.

Sebebi, olar Donbasstaǵy jaǵdaıdy estip, bilip otyr. Olardyń eki ottyń ortasynda qalǵysy joq.

Qazaqstanda qalý nemese Reseıge kóshý. Olarǵa sońǵysyn tańdaǵan tıimdi.

Avtor, Serik Máleev. 

Derekkóz: kaz.365info.kz