Aitýly sharaǵa qatysqan Oqý-aǵartý ministri kópshilikti qýanyshty sátpen quttyqtady.
– Qurmetti kieli de, qasietti Túrkistannyń arda jurty. Búgin qýanyshty ári úlken is-sharaǵa qatysyp otyrǵanyma riza bolyp turmyn. Jalpy, árbir ashylǵan jańa mektepti aǵa býynnyń elimizdiń erteńgi el tizginin ustaityn myqty urpaqty qalyptastyrýǵa qosqan úlesi dep qabyldaimyn.
Sondyqtan biz osy salany damytýǵa barlyq múmkindikti qarastyryp jatyrmyz. Osyndai úlgidegi mektepterdi aýylǵa deiin jetkizýdi josparlap otyrmyz. Kez kelgen aýyldyń mektebi jarqyrap-jainap turýy kerek, ustazdary myqty bolýy qajet. Árbir urpaq úshin sapaly bilim qoljetimdi bolýy tiis jáne elimizdegi mektepter Bilim-innovatsiia litseileri siiaqty jumys isteýi qajet, – dedi Ǵani Beisembaev.
Túrkistan oblysynyń ákimi Darhan Satybaldy oqýshylar men ustazdarǵa sáttilik tiledi.
– Memleket basshysy Qasym-Jomart Kemeluly «Biz óskeleń urpaqqa jol ashý úshin barlyq jaǵdaidy jasaýymyz kerek» dei kele bilim sapasyn jaqsartý, ustazdar men oqýshylarǵa qoldaý kórsetýdi tapsyrǵan bolatyn.
Búgingi qýanyshty sátke arnaiy kelgeni úshin Qazaqstan Respýblikasynyń Oqý-aǵartý ministri Ǵani Bektaiulyna alǵysymdy bildiremin. Bul bilim uiasy oblystyq mektepter reitingisinde – 1 orynda, respýblikada 28-orynda tur. Sondyqtan Túrkistan tórinde jańa ǵimaratyn salyp berýdi jón dep taptyq.
Aldaǵy ýaqytta osy bilim uiasyna árbir aýdan, qalanyń bilimdi oqýshylaryn shoǵyrlandyrý josparlanyp otyr. Sonymen birge basqa aýdan, qalalarda da osyndai litseilerdi jasaqtaý kózdelgen. Oqýshylardy kórip, sizderge qyzyǵyp turmyn. Bizdiń bala kezimizde mundai mektepter bolmaǵan.
Óńirde memlekettik biýdjet esebinen 33 mekteptiń qurylysy qolǵa alyndy. Qazirgi tańda osy 33 mekteptiń 10-y tapsyryldy. Jyl sońyna deiin 10 mektep, 2024 jyly qalǵan 13 mektep paidalanýǵa beriledi. Biz bul baǵyttaǵy jumystardy jalǵastyramyz.
Ustazdar men oqýshylarǵa tabys tileimin. Jańa ǵimarat qutty bolsyn! Osy mektepten elimizdi basqaratyn bilimdi, myqty azamattar shyǵa bersin! – dedi Darhan Satybaldy.
700 oryndyq mektep zamanaýi oqý quraldarymen, pán kabinetterimen, jataqhanamen qamtylǵan. Buryn Kentaýdaǵy ǵimaratta oqyǵan oqýshylar endi osy jańa ǵimaratta bilim alady.
