– Búgin irgetasy qalanǵan ortalyq ashylǵan soń oblysymyzdyń rýhanıatyna oń serpin beredi dep oılaımyn. Bul ortalyq kásipkerlerdiń jáne jalpy halyqtyń qarjylaı qoldaýymen salynady. Arnaıy esepshot jarıalanyp, oǵan kez kelgen adam úles qosa alady. Meniń oıymsha, Túrkistandaǵy meshitti salýda meniń de kishkentaı úlesim bar degen sezim azamattarǵa jiger beredi. Igi bastamaǵa qoldaý bildirip jatqan azamattarǵa alǵysymyz sheksiz – dedi oblys ákimi.
Jalpy meshittiń qurylysyna elimiz ben túrki álemine tanymal kásipkerler demeýshilik jasaıdy. Olardyń arasynda «Kentaý transformator zaýyty» AQ-nyń basqarma tóraǵasy Haırýlla Qojabaev pen «Nysh - Er» JSHS-niń dırektory Erbolat Tórejanov jáne ózge de azamattar bar.
Jobany júzege asyrý úshin «Hılýet» qaıyrymdylyq qory ashylǵan. Jıynda «BBR Yapi» JSHS quryltaıshysy Iylmaz Babýr, tarıh ǵylymdarynyń kandıdaty, arheolog Marat Tuıaqbaev sóz sóıledi.
Joba avtory Shoqan Mataıbekov rýhanı ortalyqtyń jobasymen tanystyrdy. Rýhanı ortalyq qurylysynyń bastalý kúni jazylǵan memorıaldyq tastyń janyndaǵy saltanatty jıynda bas múftı aq batasyn berip, ıgi iske sáttilik tiledi.
0,86 gektar aýmaqta ornalasqan rýhanı ortalyqtyń kólemi – 2300 sharshy metr. Qurylys jumystary bıyl qazan aıynda bastalǵan. 2022 jyly el ıgiligine beriledi. Jerasty meshitiniń qasynan boı kóteretin medreseniń aýmaǵy – 1282,8 sharshy metr. Qarılar men bolashaq din ǵulamalaryn daıarlaıtyn medrese de 2022 jyly tapsyrylady.
Bul meshittiń tarıhy tereńde jatyr. Túrkistanda XIX ǵasyrdyń ekinshi jartysynda (1864-1865 jj.) salynǵan «Qylýet» meshiti bolǵan. Meshit ǵımaraty 1960 jyly buzylyp, ornyna bir kúmbezdi jańa meshit boı kótergen. Keıin kelýshilerdiń kóbeıýine baılanysty 1980 jyly tolyq súrilip, qaıta salynǵan. 2020 jyly meshit jaramsyz dep tanylyp, buzylǵan. Qazirgi tańda meshittiń Túrkistan qalasy úshin tarıhı mańyzdylyǵy eskerile otyryp, 500 adamǵa laıyqtalyp, qaıta salý jumysy bastaldy. Sondaı-aq meshit aýmaǵynda zamanaýı oqý orny – medrese, ıaǵnı, qarılar daıyndaý ortalyǵy da boı kótermek.
