Ómirzaq Shókeev turǵyn úilerdi tez arada jylýǵa qosýdy talap etti
Túrkistan qalasynda 2021 jyldyń 1 qańtaryna deiin bos jer telimderin qosa alǵanda 40527 abonent úshin tabiǵi gaz qoljetimdi bolady. Atap aitsaq, 39937 jeke turǵyn úi, 106 áleýmettik nysan, 484 kásipkerlik nysan, 44 kópqabatty úige gaz jetkizilmek.
Túrkistan qalalyq Tótenshe jaǵdailar basqarmasy tarapynan usynylǵan 499 otbasyna gazosignalizator ornatý úshin memlekettik satyp alý konkýrsy ótkizilip, jeńizpaz anyqtalǵan. Qarasha aiynyń sońyna deiin az qamtylǵan otbasylarǵa gazosignalizator ornatylady. Túrkistan qalasynyń ákimi Nurbol Turashbekov jylýmen qamtý baǵytynda jumys júrip jatqanyn málimdedi.
– Ákimshilik-iskerlik ortalyqtaǵy 7 qabatty 10 turǵyn úidiń qurylysy 2019 jyly bastalyp, 2021 jyly qabyldaýdan ótti. Joba boiynsha turǵyn úilerdiń qurylysy aiaqtalyp, qabyldaý aktisi túzildi. Aiaqtalǵan úilerdi gazǵa qosý barysynda «QazTransGazAimaq» AQ tarapynan gazdy qosýǵa kelisim berilmedi. Sebebi gaz peshteriniń tútin shyǵarý júiesi kúidirilgen kirpishten qalanǵan. Ol turǵyndarǵa qaýip týdyrýy múmkin. Qazirgi tańda 6 úide koaksialdy qubyrlardy ornatýdy jumystary aiaqtaldy. Turǵyndar turyp jatqan 5 úide gazǵa qosý jumystary júrgizilýde. Barlyq úilerdi gazǵa qosý qarasha aiynda tolyq aiaqtalady, – dedi ol.
Óńir basshysy apparat otyrysynda Túrkistan oblystyq qurylys basqarmasynyń basshysy Toqtar Úsipálievtiń, Túrkistan oblysynyń energetika jáne turǵyn úi-kommýnaldyq sharýashylyq basqarmasynyń basshysy Rýslan Turǵambaevtyń da esepterin tyńdady.
Ómirzaq Shókeev turǵyn úilerdi der kezinde jylýǵa qospaǵan jaýapty basshylardy qatań synǵa alyp, jumysty jandandyrýdy, úilerdi tolyq jylýǵa qosýdy júktedi.
– Bes emes, on úidi tez arada jylýǵa qosý kerek. Qandai adamsyńdar? Syn ózderińe kelip tietiniń qalaisha túsinbeisińder? Qys keldi ǵoi. Jylýsyz páterde bir kún turyp kórińdershi. Turǵyndardyń bala-shaǵasy bar. Obal emes pe? Osy máseleni jedel sheshýdi tapsyramyn, – degen oblys ákimi jylý máselesi turaqty túrde kún tártibine qoiylyp, árbir merdiger men jaýapty basqarmanyń jumysy qatań baqylaýda alynatynyn jetkizdi. Sonymen birge turǵyn úilerdegi gaz qaýipsizdigin saqtaý maqsatynda tekserý jáne túsindirý jumystary da júrgiziletin boldy.
