تۇركىستان قالاسىندا 2021 جىلدىڭ 1 قاڭتارىنا دەيىن بوس جەر تەلىمدەرىن قوسا العاندا 40527 ابونەنت ءۇشىن تابيعي گاز قولجەتىمدى بولادى. اتاپ ايتساق، 39937 جەكە تۇرعىن ءۇي، 106 الەۋمەتتىك نىسان، 484 كاسىپكەرلىك نىسان، 44 كوپقاباتتى ۇيگە گاز جەتكىزىلمەك.
تۇركىستان قالالىق توتەنشە جاعدايلار باسقارماسى تاراپىنان ۇسىنىلعان 499 وتباسىنا گازوسيگناليزاتور ورناتۋ ءۇشىن مەملەكەتتىك ساتىپ الۋ كونكۋرسى وتكىزىلىپ، جەڭىزپاز انىقتالعان. قاراشا ايىنىڭ سوڭىنا دەيىن از قامتىلعان وتباسىلارعا گازوسيگناليزاتور ورناتىلادى. تۇركىستان قالاسىنىڭ اكىمى نۇربول تۇراشبەكوۆ جىلۋمەن قامتۋ باعىتىندا جۇمىس ءجۇرىپ جاتقانىن مالىمدەدى.
– اكىمشىلىك-ىسكەرلىك ورتالىقتاعى 7 قاباتتى 10 تۇرعىن ءۇيدىڭ قۇرىلىسى 2019 جىلى باستالىپ، 2021 جىلى قابىلداۋدان ءوتتى. جوبا بويىنشا تۇرعىن ۇيلەردىڭ قۇرىلىسى اياقتالىپ، قابىلداۋ اكتىسى ءتۇزىلدى. اياقتالعان ۇيلەردى گازعا قوسۋ بارىسىندا «قازترانسگازايماق» اق تاراپىنان گازدى قوسۋعا كەلىسىم بەرىلمەدى. سەبەبى گاز پەشتەرىنىڭ ءتۇتىن شىعارۋ جۇيەسى كۇيدىرىلگەن كىرپىشتەن قالانعان. ول تۇرعىندارعا ءقاۋىپ تۋدىرۋى مۇمكىن. قازىرگى تاڭدا 6 ۇيدە كواكسيالدى قۇبىرلاردى ورناتۋدى جۇمىستارى اياقتالدى. تۇرعىندار تۇرىپ جاتقان 5 ۇيدە گازعا قوسۋ جۇمىستارى جۇرگىزىلۋدە. بارلىق ۇيلەردى گازعا قوسۋ قاراشا ايىندا تولىق اياقتالادى، – دەدى ول.
ءوڭىر باسشىسى اپپارات وتىرىسىندا تۇركىستان وبلىستىق قۇرىلىس باسقارماسىنىڭ باسشىسى توقتار ۇسىپالييەۆتىڭ، تۇركىستان وبلىسىنىڭ ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ باسشىسى رۋسلان تۇرعامبايەۆتىڭ دا ەسەپتەرىن تىڭدادى.
ءومىرزاق شوكەيەۆ تۇرعىن ۇيلەردى دەر كەزىندە جىلۋعا قوسپاعان جاۋاپتى باسشىلاردى قاتاڭ سىنعا الىپ، جۇمىستى جانداندىرۋدى، ۇيلەردى تولىق جىلۋعا قوسۋدى جۇكتەدى.
– بەس ەمەس، ون ءۇيدى تەز ارادا جىلۋعا قوسۋ كەرەك. قانداي ادامسىڭدار؟ سىن وزدەرىڭە كەلىپ تيەتىنىڭ قالايشا تۇسىنبەيسىڭدەر؟ قىس كەلدى عوي. جىلۋسىز پاتەردە ءبىر كۇن تۇرىپ كورىڭدەرشى. تۇرعىنداردىڭ بالا-شاعاسى بار. وبال ەمەس پە؟ وسى ماسەلەنى جەدەل شەشۋدى تاپسىرامىن، – دەگەن وبلىس اكىمى جىلۋ ماسەلەسى تۇراقتى تۇردە كۇن تارتىبىنە قويىلىپ، ءاربىر مەردىگەر مەن جاۋاپتى باسقارمانىڭ جۇمىسى قاتاڭ باقىلاۋدا الىناتىنىن جەتكىزدى. سونىمەن بىرگە تۇرعىن ۇيلەردەگى گاز قاۋىپسىزدىگىن ساقتاۋ ماقساتىندا تەكسەرۋ جانە ءتۇسىندىرۋ جۇمىستارى دا جۇرگىزىلەتىن بولدى.
