Nurymbet Saqtaǵanovtyń aıtýynsha, 2025 jyldyń qorytyndysyna sáıkes oblysta oń dınamıka baıqalady. Investısıa, qurylys, aýyl sharýashylyǵy jáne saýda salalary ósim kórsetip otyr. Negizgi kapıtalǵa salynǵan ınvestısıa kólemi 838 mıllıard teńgeden asty. Investısıalyq portfelde 101 joba bar. Qurylys jumystarynyń kólemi 460 mıllıard teńgege jýyqtady. Aýyl sharýashylyǵyndaǵy jalpy ónim 550 mıllıard teńgeden, al saýda salasynda 2 460 mıllıard teńgeden asty. 407 myń sharshy metrden astam turǵyn úı paıdalanýǵa berildi. Jumyssyzdyq deńgeıi 4,6 paıyz deńgeıinde turaqtap, 29 myń adam eńbekpen qamtyldy.
Qasym-Jomart Toqaevqa Jumyspen qamtýdyń óńirlik kartasy aıasynda bıyl 17 440 jumys ornyn ashý (İ toqsannyń qorytyndysy boıynsha 3 317 jumys orny ashyldy) qarastyrylyp otyrǵany jóninde málimet berildi. Áleýmettik salada AÁK alýshylar sany azaıyp keledi.
Aýyldyq aýmaqtardy damytý jáne qonystanýshylardy qoldaý baǵdarlamalary, sonyń ishinde «Shyǵys shaqyrady» óńirlik jobasy júzege asyrylyp jatyr.
Shyǵys Qazaqstanda ınfraqurylymdy jańǵyrtýǵa basa mán beriledi. Byltyr uzyndyǵy 856 shaqyrym bolatyn joldar men kóshelerde jóndeý jumystary aıaqtaldy.
Kezdesý sońynda Memleket basshysy ekologıalyq ahýaldy jaqsartý, ekonomıkany ártaraptandyrý, ınvestısıa tartý jáne óńirdegi týrızmdi damytý jumystaryn jalǵastyrý boıynsha birqatar tapsyrma berdi.
