Memleket basshysy Shyǵys Qazaqstan oblysynyń ákimi Nurymbet Saqtaǵanovty qabyldady, dep habarlaidy Dalanews.kz.
Prezidentke óńirdiń áleýmettik-ekonomikalyq damýy men ornyqty ósimin qamtamasyz etý boiynsha atqarylyp jatqan sharalar týraly baiandaldy.
Nurymbet Saqtaǵanovtyń aitýynsha, 2025 jyldyń qorytyndysyna sáikes oblysta oń dinamika baiqalady. Investitsiia, qurylys, aýyl sharýashylyǵy jáne saýda salalary ósim kórsetip otyr. Negizgi kapitalǵa salynǵan investitsiia kólemi 838 milliard teńgeden asty. Investitsiialyq portfelde 101 joba bar. Qurylys jumystarynyń kólemi 460 milliard teńgege jýyqtady. Aýyl sharýashylyǵyndaǵy jalpy ónim 550 milliard teńgeden, al saýda salasynda 2 460 milliard teńgeden asty. 407 myń sharshy metrden astam turǵyn úi paidalanýǵa berildi. Jumyssyzdyq deńgeii 4,6 paiyz deńgeiinde turaqtap, 29 myń adam eńbekpen qamtyldy.
Qasym-Jomart Toqaevqa Jumyspen qamtýdyń óńirlik kartasy aiasynda biyl 17 440 jumys ornyn ashý (I toqsannyń qorytyndysy boiynsha 3 317 jumys orny ashyldy) qarastyrylyp otyrǵany jóninde málimet berildi. Áleýmettik salada AÁK alýshylar sany azaiyp keledi.
Aýyldyq aýmaqtardy damytý jáne qonystanýshylardy qoldaý baǵdarlamalary, sonyń ishinde «Shyǵys shaqyrady» óńirlik jobasy júzege asyrylyp jatyr.
Shyǵys Qazaqstanda infraqurylymdy jańǵyrtýǵa basa mán beriledi. Byltyr uzyndyǵy 856 shaqyrym bolatyn joldar men kóshelerde jóndeý jumystary aiaqtaldy.
Kezdesý sońynda Memleket basshysy ekologiialyq ahýaldy jaqsartý, ekonomikany ártaraptandyrý, investitsiia tartý jáne óńirdegi týrizmdi damytý jumystaryn jalǵastyrý boiynsha birqatar tapsyrma berdi.
