Qazaqstanda Memlekettik kúzet qyzmeti qyzmetkerleriniń ókilettigin keńeitý kózdelip otyr. Usynylǵan zań jobasyna sáikes, belgili bir jaǵdailarda qarýdy eskertýsiz qoldanýǵa ruqsat berilýi múmkin, dep habarlaidy Dalanews.kz.
Májilis arnaiy memlekettik organdardyń qyzmetine qatysty zańnamalyq ózgerister jobasyn birinshi oqylymda qarady. Qujatqa sáikes, terrorizmge qarsy operatsiialar aimaǵynda qyzmet atqaratyn memlekettik kúzet qyzmetkerlerine fizikalyq kúsh, arnaiy quraldar, qarý-jaraq, áskeri jáne ózge de tehnika, sondai-aq qyzmettik janýarlardy eskertýsiz ári qoldanystaǵy shekteýlersiz paidalaný quqyǵy beriledi.
Sonymen qatar qajetti qorǵanys, asa qajettilik nemese quqyq buzýshylardy ustaý kezinde qyzmetkerlerge arnaiy qarý nemese jabdyq bolmaǵan jaǵdaida, kez kelgen qolda bar quraldardy qoldanýǵa ruqsat etiledi. Budan bólek, zań aiasynda tirkelmegen ózge qarý túrlerin de belgilengen tártippen paidalaný qarastyrylǵan.
Májilis depýtaty Bolat Kerimbektiń aitýynsha, zań jobasy arnaiy organdarǵa IT-mamandar men daryndy jastardy tartýdy, sondai-aq ulttyq qaýipsizdik organdarynyń tótenshe jaǵdailar kezindegi áreket etý ókilettigin naqtylaýdy kózdeidi.
Qujatta memlekettik qupiialardy qorǵaýdy kúsheitý de usynylǵan. Atap aitqanda, olardyń qorǵalý deńgeiiniń tómendeýi ulttyq qaýipsizdikke tónetin qaýip retinde qarastyrylady. Sonymen birge, ekstremistik jáne terroristik materialdardy taratýǵa ǵana emes, olardy saqtaýǵa da tyiym salý engiziledi.
Ilespe zań jobasynda memlekettik qupiialardy qorǵaý talaptaryn qaitalap buzǵany úshin jaýapkershilikti kúsheitý qarastyrylǵan. Sondai-aq Memlekettik kúzet qyzmetine ákimshilik quqyq buzýshylyqtar boiynsha hattamalardy óz betinshe toltyrý quqyǵyn berý usynylyp otyr.
Aita keteiik, Memlekettik kúzet qyzmeti - Qazaqstannyń ulttyq qaýipsizdigin qamtamasyz etetin arnaiy organ. Ol Prezidentke tikelei baǵynady jáne esep beredi. Qyzmet 2014 jyly Prezident kúzeti men Respýblikalyq gvardiianyń birigýi negizinde qurylǵan. Quramyna "Aibyn" jáne "Batyr" prezidenttik polkteri kiredi.
