«Kegen – Narynqol» avtojolynyń 20-shaqyrymyndaǵy joldyń bir bóligi opyryldy, dep habarlaidy Dalanews.kz.
Respýblikalyq mańyzy bar «Kegen – Narynqol» tas jolynyń 20-shaqyrymynda erigen qar sýynyń kúrt kóbeiýine bailanysty tótenshe jaǵdai boldy. Jol qyzmetiniń mamandary josparly patrýldeý kezinde atalǵan ýchaskedegi sý deńgeiiniń shekten tys artqanyn der kezinde anyqtap, qaýiptiń aldyn aldy.
Qarqyndy erigen qar sýynyń qysymy saldarynan 1960–1970 jyldary salynǵan sý ótkizgish qubyrdyń 4–5 býyny buzylǵan. Nátijesinde qubyr aýzy bitelip, joldyń jer tósemi búkil eni boiynsha shaiyldy. Opyrylǵan aimaqtyń eni shamamen 12 metrdi, tereńdigi 10 metrdi quraidy. 150 m² asfalt jamylǵysy búlingen.
Aita ketý kerek, bul ýchaske sońǵy 50 jyl ishinde «sý basý qaýpi bar aimaqtar» tizimine kirmegen. Erigen sýdyń mundai joiqyn kólemi buryn-sońdy tirkelmegen. Qazirgi ýaqytta sý jol jiegimen aǵyp, Qabandy ózenine, odan ári Kegen ózenine quiylýda.
Jol qozǵalysy jedel túrde toqtatylyp, qaýipsiz ainalma jol uiymdastyryldy.
Jol-kólik oqiǵalaryna jol berilgen joq, zardap shekkender men materialdyq shyǵyn joq.
Oqiǵa ornyna arnaiy tehnika jumyldyrylyp, jaqyn arada qiyrshyq tas tóselgen ýaqytsha jol salynady.
Atalǵan ýchaske qazirgi ýaqytta ortasha jóndeý júrgizý úshin merdiger uiymnyń ieliginde. Sýdyń aǵysy basylǵan boida qubyr men jol jamylǵysyn tolyq qalpyna keltirý jumystary bastalady. Joba aiasynda joldyń tabiǵi áserlerge tózimdiligin arttyrý sharalary qarastyrylǵan.
Oqiǵa ornynda Kegen jáne Raiymbek aýdany ákimi, ákim orynbasarlary, politsiia basshylary, TJM qyzmetkerleri, QazSeldenQorǵaý mamandary júr.
Jaǵdai tolyqtai baqylaýda.
